Галахер: вітаем усе ініцыятывы па дасягненні міру ў Святой Зямлі
Марыя Валодзіна - Vatican News
Святы Пасад заўсёды з асаблівай увагай сачыў за сітуацыяй, якая складваецца на тэрыторыях, дзе сёння размешчаны Ізраіль і Палестына. Ён цвёрда перакананы ў тым, што мір паміж ізраільцянамі і палестынцамі прынёс бы карысць усёй міжнароднай супольнасці. Таму ён вітае любую мірную ініцыятыву, якая ўлічвала б інтарэсы мясцовага насельніцтва і законныя патрабаванні як Ізраіля, так і Палестыны, - зазначыў Сакратар па адносінах Святога Пасада з дзяржавамі і міжнароднымі арганізацыямі.
Сумна адзначаць, што ізраільска-палестынскі канфлікт усё яшчэ стаіць на павестцы дня праз 30 гадоў пасля падпісання ў Осла пагадненняў пра магчымыя шляхі стварэння дзвюх дзяржаў для двух народаў, - сказаў ватыканскі дыпламат, нагадаўшы пра тое, што Святы Пасад падтрымлівае дыпламатычныя адносіны з Ізраілем (з 1993 года), Іярданіяй (з 1994 года) і Палестынай (з 2012 года).
Цэнтральным спрэчным пытаннем, якое неабходна вырашыць для дасягнення стабільнага і трывалага міру, з'яўляецца пытанне аб статусе Іерусаліма, вельмі важнага для хрысціян, яўрэяў і мусульман. Святы Пасад разглядае Іерусалім не як месца канфрантацыі і падзелу, а як месца сустрэчы, дзе хрысціяне, іўдзеі і мусульмане маглі б жыць разам у павазе адзін да аднаго. Любыя акты нецярпімасці павінны быць адназначна асуджаныя, пераследвацца па законе і прадухіляцца з дапамогай выхавання ў духу братэрства, - заявіў арцыбіскуп Галахер.
Ён заклікаў прызнаць Іерусалім "горадам сустрэчы", які ахоўваецца спецыяльным статусам, прынятым на міжнародным узроўні. Той, хто кіруе Іерусалімам, павінен прытрымлівацца такіх прынцыпаў, як роўныя правы і абавязкі вернікаў трох монатэістычных рэлігій, абсалютную гарантыю свабоды веравызнання і павага да рэжыму Status Quo там, дзе ён ужываецца.
Арцыбіскуп Галахер нагадаў пра неаднаразовыя заклікі Францішка да дыялогу паміж ізраільцянамі і палестынцамі. Ён нагадаў пра сустрэчу тагачаснага прэзідэнта Ізраіля Шымона Перэса і кіраўніка Палесціны Махмуда Абаса, якая прайшла ў 2014 годзе ў Ватыкане. Палітычныя лідары разам з Францішкам пасадзілі аліўкавае дрэва, як сімвал надзеі на мір. З тых часоў падобных сустрэч на высокім узроўні не праводзілася.
"Аднак мы працягваем паліваць тое аліўкавае дрэва, чакаючы, калі прэзідэнты абедзвюх дзяржаў у суправаджэнні сваіх урадаў прыедуць, каб сабраць плён міру”, - сказаў напрыканцы сваёй прамовы Сакратар па адносінах Святога Пасада з дзяржавамі і міжнароднымі арганізацыямі.
