Святы Пасад апублікаваў фінансавую справаздачу за 2022 год

Марыя Валодзіна - Vatican News

Паводле балансу, у 2022 годзе на патрэбы Рымскай курыі было выдаткавана 32,27 мільёна еўра. Гэта менш, чым у 2021 годзе, калі Курыя атрымала 38,1 мільёна еўра. Асноўная прычына скарачэння фінансавання – нестабільнасць рынкаў у сувязі з вайной ва Украіне.

Паведамляецца, што ў 2022 годзе была адзначана больш высокая прыбытковасць актываў у сферы нерухомасці, якая павялічылася на 32 мільёны еўра ў параўнанні з 2021 годам. Станоўчую ролю ў гэтым адыграла аднаўленне пасля пандэміі каронавіруса.

Што тычыцца кіравання рухомай маёмасцю, у гэтай сферы адзначаецца адмоўны вынік у памеры 6,7 мільёна еўра. Сярод прычын – рэзкае пагаршэнне макраэканамічнай і геапалітычнай абстаноўкі, энергетычны крызіс, канфлікт ва Украіне, падзенне фондавага рынку і рынку каштоўных папер. Таксама выраслі эксплуатацыйныя выдаткі Святога Пасада: ад 10 да 13 мільёнаў еўра.

Акрамя таго, у справаздачы згадваецца трохгадовы план APSA па далейшаму ўдасканаленню дзейнасці і паляпшэнню вынікаў, які можа прынесці прыбытак у памеры каля 55,4 мільёнаў еўра. У прыватнасці, вядзецца актыўная праца над праектам здачы ўнаём незанятых будынкаў. 79 аб'ектаў нерухомасці ўжо былі адрамантаваныя і здаюцца ўнаём, застаецца аднавіць яшчэ 61 аб'ект, які зараз не выкарыстоўваецца.

У цэлым, згодна са справаздачай, у маёмасці Святога Пасада знаходзяцца 4072 аб'екта нерухомасці. У 2022 годзе ў італьянскую казну было выплачана амаль 9 мільёнаў еўра падаткаў: 6,05 мільёна еўра адзінага муніцыпальнага падатку (IMU) і 2,91 мільёна еўра ў якасці падатку на прыбытак для прадпрыемстваў (IRES).

Па словах кіраўніка Адміністрацыі маёмасці Святога Пасада, біскупа Нунцыа Галанціна, празрыстасць з'яўляецца “адным з інструментаў для прадухілення неабгрунтаваных падазрэнняў” у дачыненні да велічыні маёмасці Касцёла, а таксама да выканання такіх абавязкаў, як выплата падаткаў.