Святы Пасад: мы падзяляем жаданне сям'і Арландзі знайсці ісціну

Марыя Валодзіна - Vatican News

Офіс прамотара справядлівасці “актыўна супрацоўнічае з кампетэнтнымі органамі ўлады Італіі” у сувязі з расследаваннем справы аб знікненні Эмануэлы Арландзі, - адзначыў 12 ліпеня 2023 года Матэа Бруні.

Ён нагадаў, што 19 красавіка 2023 года Святы Пасад перадаў італьянскім уладам усю наяўную дакументацыю па справе Арландзі, у тым ліку сабраную ў папярэднія месяцы ў ходзе следства.

Кіраўнік Залы Друку падкрэсліў, што "Святы Пасад падзяляе жаданне сям'і ўстанавіць ісціну пра факты і спадзяецца, што ўсе гіпотэзы расследавання будуць разгледжаны". Што тычыцца паведамленняў пра сваяка Эмануэлы Арландзі, якія з’явіліся ў сродках масавай інфармацыі, Матэа Бруні заявіў, "што адпаведная карэспандэнцыя сведчыць аб адсутнасці парушэння таямніцы споведзі".

Нагадаем, што дачка ватыканскага супрацоўніка Эмануэла Арландзі знікла без вестак у чэрвені 1983 года ва ўзросце 15 гадоў. Яе цела да гэтага часу не знойдзена. У студзені 2023 года ў адказ на просьбы сям’і прамотар справядлівасці Дзяржавы Ватыкан Алесандра Дзідзі аднавіў расследаванне па справе аб знікненні дзяўчыны.