У Ватыканскіх музеях пакажуць тры П’еты Мікеланджэла
Марыя Валодзіна – Vatican News
На выставе, якая размесціцца ў Пінакатэцы музеяў, будуць прадстаўлены тры знакамітыя П'еты Мікеланджэла Буанароці: ранняя і найбольш выбітная Ватыканская П'ета, або Аплакванне Хрыста, больш позняя П'ета Бандыні і загадкавая П'ета Ранданіні. Тры гіпсавыя копіі гэтых скульптур былі зробленыя паміж ХІХ і ХХ стагоддзямі.
Мяркуецца, што каштоўныя гіпсавыя экспанаты дадуць магчымасць гледачам пазнаёміцца з эвалюцыяй незвычайнага пластыкавага мастацтва Мікеланджэла, а таксама з яго духоўным шляхам, ад юнацтва, калі ў Рыме ва ўзросце дваццаці чатырох гадоў ён стварыў сваю першую П'ету, да поўнай сталасці з яго П'етой Бандыні ў Фларэнцыі, і апошніх гадоў, калі стары скульптар стварыў П'ету Ранданіні ў міланскім замку Сфорца.
Выстава, прымеркаваная да Вялікага посту і Вялікадня, распачнецца 30 сакавіка 2023 года і працягнецца да 6 студзеня 2024 года.
Рымская экспазіцыя – гэта трэці і апошні этап выставы: раней, на працягу 2022 года, яна праходзіла ў Фларэнцыі і Мілане.
