Францішак памаліўся за спачылага кардынала Томка
Аляксандр Панчанка - Vatican News
Эўхарыстыю цэлебраваў кардынал Джавані Батыста Рэ, дэкан Калегіі кардыналаў, які ў гаміліі нагадаў, што спачылы іерарх быў найстарэйшым сярод кардыналаў. Усё сваё доўгае жыццё кардынал Томка прысвяціў служэнню Богу і братам, а шматлікія прызначэнні ў Рымскай курыі ён заўсёды ўспрымаў як “пакліканне да служэння”, - дадаў ён.
Успамінаючы пра жыццёвы і святарскі шлях памерлага іерарха, які быў пазначаны моцным місійным і апостальскім запалам, кардынал Рэ, звярнуў асаблівую ўвагу на перыяд яго служэння на пасадзе прэфекта Кангрэгацыі евангелізацыі народаў, пазначаны адкрытасцю на народы, іх культуры і сэнс паўсюднасці.
“У духоўным запавеце, складзеным 26 лютага 2007 года, кардынал Томка сцвярджаў, што служэнне, якое ён выконваў на пасадзе прэфекта Кангрэгацыі евангелізацыі народаў, “захапіла яго сэрца”, і дадаваў: “Я разумеў гэта служэнне як уклад у будаўніцтва і развіццё містычнага цела Касцёла і палюбіў маладыя місійныя Касцёлы ва ўсёй іх прыгажосці і крохкасці: цэлебрацыі, біскупаў і місіянераў, семінарыстаў, законніц, часта бедны народ. Было прыемна працаваць і пакутаваць за гэты жывы місійны Касцёл!”, - нагадаў словы спачылага іерарха кардынал Джавані Батыста Рэ.
“Даверым Богу ў малітве гэтага нашага сабрата, каб у бязмежнасці Сваёй любові адарыў яго радасцю і супакоем, здабытымі ў яго верным і шчырым служэнні Касцёлу, Папу і Апостальскай Сталіцы”, - сказаў ён, заклікаючы чэрпаць натхненне са сведчання, якое даў кардынал Томка.
Кардынал Юзаф Томка адышоў у вечнасць раніцай 8 жніўня 2022 года ў 98-гадовым узросце. Некалькі тыдняў таму падчас лячэння траўмы пазваночніка ён перанёс інфекцыю COVID-19. Паводле апошняга жадання, славацкі іерарх будзе пахаваны ў Кошыцах, у катэдры святой Альжбеты. Пахальную літургію 16 жніўня ўзначаліць кардынал Дамінік Дука, арцыбіскуп-эмерыт Пражскі.
