Пошук

Vatican News
Ілюстрацыйнае фота Ілюстрацыйнае фота 

Францішак ухваліў нормы для капітула базылікі св. Пятра

28 жніўня 2021 г. Папа зацвердзіў пераходныя нормы для капітула ватыканскай базылікі св. Пятра. Яны ўвойдуць у сілу 1 кастрычніка 2021 г. і стануць часткай рэформы гэтай тысячагадовай структуры.

Аляксандр Панчанка – Vatican News

Мэта новаўвядзенняў заключаецца ў тым, каб даць імпульс клопату пра літургічнае і душпастырскае жыццё ў базыліцы, які канонікі дагэтуль ажыццяўлялі пераважна ў нядзелі і святочныя дні.

Новыя нормы між іншым тычацца ганарараў, якія атрымліваюць канонікі і памочнікі капітула. Цяпер яны не могуць быць аб’яднаны з іншымі фінансавымі паступленнямі за выкананне паслугаў у Рымскай курыі і структурах, звязаных з Апостальскай Сталіцай. Новаўвядзенні закранулі таксама ажыццяўленне эканамічнай дзейнасці, звязанай з Скарбніцай базылікі св. Пятра і продажам рэлігійных атрыбутаў. Цяпер усе гэтыя пытанні будуць знаходзіцца ў кампетэнцыі Фабрыкі св. Пятра. Капітул будзе надалей адказваць за захаванне і кіраванне маёмаснай і фінансавай спадчынай, якой цяпер валодае, і яе магчымы продаж.

Капітул базылікі св. Пятра складаецца са святароў, якіх Пантыфік прызначае канонікамі, і іх памочнікаў. Як структура ён узнік у 1053 г., калі папа Леў ІХ, фармалізаваў дзейнасць, што ажыццяўлялася ў базыліцы на працягу стагоддзяў, дзякуючы літургічнаму і малітоўнаму служэнню манахаў, якія прадстаўлялі розныя кляштары. З часоў пантыфікату Яўгенія IV (1145-1153) капітул паступова ператварыўся ў аўтаномную супольнасць, перайшоўшы ад манаскай структуры да аб’яднання канонікаў.

Дзейнасць капітула ад самага пачатку ахоплівае розныя сферы, ад літургічнай да кіравання маёмасцю базылікі і філіяльных храмаў, ад душпастырства да дабрачыннасці. У 2007 г. Бэнэдыкт XVI адзначаў, што на працягу апошніх дзесяцігоддзяў дзейнасць капітула паступова скіроўваецца да таго, каб нанава адкрыць яе “сапраўдныя першапачатковыя функцыі, якія заключаюцца, у першую чаргу, у малітоўным служэнні”.

 

28 жніўня 2021, 16:00