Амерыканец стаў сакратаром Камісіі па абароне непаўналетніх

Аляксандр Амяльчэня - Vatican News

У інтэрв’ю Vatican News кс. Смол прызнаўся, што бачыць “відавочныя прыкметы” ўступлення працы Камісіі ў новую фазу, пасля таго, як Святы Айцец заклікаў структуру пашырыць сетку абароны падлеткаў на ўвесь Касцёл.

Новы сакратар лічыць сваёй першачарговай задачай увагу да пацярпелых у выніку злоўжыванняў з боку людзей Касцёла, а таксама вызначэнне наступных крокаў Камісіі. Ахвяры павінны адчуваць, што касцёльныя структуры адкрытыя і празрыстыя. Толькі так можна гарантаваць абарону ўразлівых груп на практыцы, а не толькі ў тэорыі.

Камісію па абароне непаўналетніх папа Францішак заснаваў 5 снежня 2013 г. У яе склад уваходзяць эксперты, якія маюць вялікі вопыт у гэтай галіне, сярод іх ёсць псіхолагі, педагогі, адвакаты, якія расследавалі выпадкі сексуальных злоўжыванняў. У камісіі прадстаўлены розныя кантыненты і краіны, яе кіраўніком з’яўляецца арцыбіскуп Бостана, кардынал Шон О'Мэлі. Усходнюю Еўропу прадстаўляе былы прэм'ер-міністр Польшчы і былы польскі пасол у Ватыкане Ханна Сухоцка.