Пошук

Vatican News
Папа Францішак і кардынал Луіс Антоніа Тагле Папа Францішак і кардынал Луіс Антоніа Тагле  (AFP or licensors)

Кардынал заклікаў уважліва вывучаць энцыкліку Fratelli tutti

Прэфект Кангрэгацыі евангелізацыі народаў адзначыў, што новая сацыяльная энцыкліка Папы Fratelli tutti вучыць любіць усіх людзей, праз канкрэтныя ўчынкі і без прадузятасці.

Кардынал Луіс Антоніа Тагле прыняў удзел у вэбінары на тэму новага дакумента Францішка, арганізаваным Caritas Internationalis.

Іерарх заўважыў, што Папа прапануе ідэі, якія ўжо выказваліся ім раней, у новай форме, спрабуючы даць адказ “на актуальную сітуацыю закрытага свету”. Ён абапіраецца на багатую біблійную традыцыю Касцёла і на яго этычнае і сацыяльнае вучэнне.

Кардынал звярнуў увагу на сумныя “знакі недахопу любові, што прычыняе шмат пакут сучаснаму свету”. Свет замыкаецца ў сабе, ад чаго пакутуюць усе, асабліва бедныя. Яны з’яўляюцца тымі, каго з лёгкасцю забываюць і спісваюць ва ўтыль. Закрыты свет будзе мець наступствы для людзей, будучыні і стварэння, - заўважыў іерарх.

Прэфект звярнуў увагу на два важныя аспекты, якія падкрэсліваюцца ў энцыкліцы. Першы – гэта паўсюдная любоў, да якой заклікае Францішак. Менавіта такую любоў мае Бог да людзей, у тым ліку да тых, каго не прымае грамадства. Другі – неабходнасць будавання культуры сустрэчы. Паўсюдная любоў можа з лёгкасцю пераўтварыцца ў банальны слоган, калі не будзе рэалізавацца ў штодзённым жыцці.

Старшыня Caritas Internationalis заклікаў да дыялогу на міжнародным узроўні, які павінен адбывацца на падставе павагі да ўласнай тоеснасці і спрыяння любові. Кардынал Тагле выказаў пажаданне, каб дзякуючы культуры сустрэчы былі знойдзены лепшыя спосабы вядзення палітычнай і эканамічнай дзейнасці, усталявання сяброўства і вырашэння канфліктаў.

13 лістапада 2020, 12:51