Ватыканскі іерарх пра выклікі сучаснай катэхізацыі

Старшыня Папскай рады па новай евангелізацыі пракаментаваў выхад новага “Дапаможніка па катэхезе”, падрыхтаванага дыкастэрыяй, якую ён узначальвае. Іерарх распавёў, што апошні раз такога роду дакумент выдаваўся ў 1997 г. З таго часу адбылося шмат змен, у тым ліку распаўсюджванне “лічбавай культуры”.

Арцыбіскуп Фізікела заўважыў, што катэхізацыя павінна ахопліваць усё жыццё ахрышчанага і ўсіх ахрышчаных: дзяцей, падлеткаў, дарослых людзей, сем’і, пажылых, зняволеных, мігрантаў.

Іерарх звярнуў увагу на блізкую сувязь паміж катэхізацыяй і евангелізацыяй, якая асаблівым чынам падкрэсліваецца ў ватыканскім дакуменце. Катэхізацыя павінна дапамагаць глыбей разумець таямніцу веры і ўключацца ў жыццё Касцёла, ставіць яму на службу свае дары і даваць сведчанне паслядоўным чынам, - дадаў ён.

Арцыбіскуп Фізікела перакананы, што “Дапаможнік па катэхезе” з’яўляецца каштоўнай прыладай для ўключэння ў катэхізацыю бацькоў і сем’і, правядзення яе ў месцах зняволення, сярод мігрантаў, інвалідаў, бедных. На яго падставе мясцовыя епіскапаты, ведаючы кантэкст сваіх краін, могуць распрацаваць свае дапаможнікі, якія будуць лепш адпавядаць сучасным выклікам і новай культуры, у якой жыве Касцёл.