Пошук

Vatican News
Андрэа Тарніэлі Андрэа Тарніэлі  Калонка рэдактара

Ватыканскі медыя-эксперт пра ліст Папы да біскупаў ЗША

Давер да Касцёла нельга аднавіць маркетынгавымі стратэгіямі, падкрэсліў, каментуючы пасланне Папы да біскупаў ЗША, Андрэа Тарніелі, кіраўнік Рэдакцыйнай дырэкцыі Дыкастэрыі па камунікацыі.

Ватыканскі медыя-эксперт зазначыў, што ў сваім лісце Пантыфік указвае шлях для ўсяго Касцёла і прапануе ключ да разумення свайго погляду на крызіс, выкліканы злоўжываннямі, у тым ліку ў святле лютаўскай сустрэчы ў Ватыкане.

Тарніелі нагадаў, што Папа шырока, рашуча і цвёрда выказаўся на гэту тэму ў прамове да Рымскай курыі, з прадстаўнікамі якой сустрэўся напярэдадні Божага Нараджэння. Зараз, у пасланні да біскупаў Злучаных Штатаў, ён не ўваходзіць у дэталі феномена злоўжывання ўладай, сумленнем і сексуальных злоўжыванняў, але глядзіць у корань праблемы, указваючы шлях яе рашэння.

“Давер да Касцёла – ячшэ раз прызнае Папа, – быў моцна падарваны і пастаўлены пад сумнеў гэтымі грахамі і злачынствамі, але асабліва жаданнем іх замаскіраваць і схаваць”. “Але менавіта ў прапанаваным адказе варта шукаць галоўнае пасланне гэтага ліста. Францішак перасцерагае ад залішняга спадзявання на дзеянні, якія здаюцца “карыснымі, добрымі і неабходнымі”, і нават “справядлівымі”, але ў якіх няма “смаку Евангелля”, калі яны імкнуцца абмежаваць адказ на няшчасце праблемай арганізацыйнага характару”, - напісаў Андрэа Тарніелі.

Паводле яго слоў, Касцёл не заўсёды мае “смак Евангелля”, калі ператвараецца ў “агенцтва чалавечых рэсурсаў”, што пакладае надзею толькі на стратэгіі, структуры і “best practice” прадпрыемстваў, не давяраючы, у першую чаргу, прысутнасці Таго, Хто ўжо дзве тысячы гадоў вядзе яго збаўчай сілай ласкі, маўклівым і штодзённым дзеяннем Святога Духа.

“Ужо некалькі гадоў таму Пантыфікі ўвялі больш адпаведныя і строгія правілы з мэтай супрацьдзеяння феномену злоўжыванняў: іншыя ўказанні будуць распрацаваны на калегіяльнай сустрэчы біскупаў усяго свету ў еднасці з Папам. Але сродак можа аказацца неэфектыўным, калі не будзе суправаджацца “пераменай нашага спосабу мыслення (метаноя), малітвы, кіравання грашыма і ўладай, ажыцяўлення аўтарытэта, а таксама нашых адносін адно да аднаго і да свету”, - напісаў ватыканскі медыя-эксперт.

“Давер нельга аднавіць маркетынгавымі стратэгіямі. Ён можа быць плёнам Касцёла, які ўмее пераадольваць падзелы і ўнутраныя супрацьстаянні; Касцёла, дзейнасць якога паходзіць ад адлюстравання святла, што належыць не яму, але якое яму няспынна дорыцца. Гэты Касцёл не абвяшчае самога сябе і сваю кампетэнтнасць, але складаецца з пастыраў і вернікаў, якія, як сцвярджае Папа, прызнаюць сябе грэшнікамі і заклікаюць да навяртання, бо на сябе спазналі і спазнаюць прабачэнне і міласэрнасць”, - завяршыў каментар Андрэа Тарніелі.

Навіна ў фармаце аўдыё
04 студзеня 2019, 13:42