Бэта версія

Cerca

VaticanNews
Ілюстрацыйнае фота Ілюстрацыйнае фота 

Святы Пасад адказаў на абвінавачванні перуанскай прэсы

Апостальская Сталіца абвяргае паведамленні аб тым, што Луісу Фернанда Фігары, заснавальніку Таварыства апостальскага жыцця “Sodalitium Christianae Vitae”, Касцёл дапамагаў пазбегнуць правасуддзя.

На сайце Канферэнцыі Біскупаў Перу было апублікавана спецыяльнае камюніке Кангрэгацыі па справах Інстытутаў кансэкраванага жыцця і Таварыстваў апостальскага жыцця, падставай для якога паслужылі абвінавачванні, змешчаныя ў перуанскай прэсе, што Святы Пасад, нібыта, “хавае” і “абараняе” Луіса Фернанда Фігары.

Каля дзесяці гадоў таму былі выкрыты выпадкі сур’ёзных злоўжыванняў ва унутраным функцыянаванні, фармацыі і эканамічна-фінансавым кіраванні ў заснаваным гэтым свецкім вернікам Таварыстве. Фігары быў абвінавачаны ў фізічным, псіхалагічным і сексуальным насіллі над маладымі людзьмі, у тымі ліку над непаўналетнімі. Падчас раскрыцця злачынстваў, ён жыве ў пакуце і ізаляцыі ў адным з кляштараў.

Кангрэгацыя нагадала пра ліст, які 30 студзеня 2017 г. скіравала на імя Генеральнага настаяцеля “Sodalitium Christianae Vitae”. З яго вынікае, што менавіта ватыканскае ведамства, на падставе атрыманых ім дадзеных, ініцыявала расследаванне вялікай колькасці цяжкіх злачынстваў Фігары.

У лісце гаварылася, што Фігары не можа вярнуцца ў Перу, дзе ў яго ёсць “шматлікія прыхільнікі і большыя магчымасці, каб нанесці ўрон людзям, схаваць ці знішчыць доказы супраць сябе” або “перашкодзіць ходу касцёльнага і дзяржаўнага правасуддзя”. У паведамленні дыкастэрыі ўдакладняецца, што не мелася на ўвазе абсалютная забарона, бо як гаворыцца ў тым жа мінулагоднім лісце, “спадар Фігары можа вярнуцца ў Перу па сур’ёзных прычынах і з пісьмовага дазволу Генеральнага настаяцеля”.

Паколькі ў “Sodalitium Christianae Vitae” з 10 студзеня 2018 г. праходзіць камісарскай праверка, гэты дазвол можа быць дадзены Апостальскім камісарам, калумбійскім біскупам Ноэлем Антоніа Ландоньё Буітрага.

Удакладняецца, што Кангрэгацыя па справах Інстытутаў кансэкраванага жыцця і Таварыстваў апостальскага жыцця звяртала ўвагу на немэтазгоднасць вяртання Фігары ў Перу, але не выносіла такога рашэння і не раіла Генеральнаму настаяцелю, каб ён працягваў пражываць у Рыме або Ватыкане “дзе, насамрэч, ніколі не пражываў”. Была толькі скіравана просьба, каб ён пражываў там, дзе няма прадстаўнікоў заснаванага ім Таварыства, каб ён не меў з імі кантактаў, не рабіў публічных заяў і не ўдзельнічаў у публічных маніфестацыях.

Рашэнне аб знаходжанні Фігары ў Рыме прыняў сам Генеральны настаяцель Таварыства, каб “пазбегнуць, наколькі гэта магчыма, прычынення дадатковага ўрону якой-небудзь асобе”, каб “абараніць ахвяр і забяспечыць належны ход правасуддзя”. “Такім чынам, гаворка не ідзе пра абарону ці якія-небудзь прывілегіі” для Фігары. У будучыні, калі ўзнікне неабходнасць у яго вяртанні ў Перу для патрэб правасуддзя, “гэта можа быць ухвалена Апостальскім камісарам”, гаворыцца ў паведамленні Святога Пасаду.

Таварыства “Sodalitium Christianae Vitae” было заснавана ў 1971 г. Гэта адно з самых распаўсюджаных каталіцкіх аб’яднанняў у Лацінскай Амерыцы з вялікай колькасцю навучальных устаноў і актыўнай евангелізацыйнай дзейнасцю. Злачынствы ўнутры Таварыства былі выкрыты незалежнай камісіяй, якая выслухала сведчанні больш чым 200 асоб. У яе справаздачы гаворыцца пра шматлікія выпадкі сексуальнага, фізічнага і псіхалагічнага насілля, якія Фігары здзейсніў у перыяд паміж 1975-2009 гг.

Навіна ў фармаце аўдыё
07 чэрвеня 2018, 15:53