Папскі ліст да студэнтаў-вязняў
Аляксандр Амяльчэня - Vatican News
Ліст з Ватыкана прыйшоў рэктару Люблінскага каталіцкага ўніверсітэта, ксяндзу-прафесару Міраславу Каліноўскаму. Нагодай стала ўрачыстае адкрыццё навучальнага года ў адукацыйным цэнтры следчага ізалятара. Цырымонія была прымеркавана да дзесяцігадовага юбілею навучання зняволеных Люблінскім каталіцкім універсітэтам імя Яна Паўла II.
“Калі хтосьці адчувае сябе самотным і пакінутым, давайце не забываць, што Маці Божая блізкая да нас, асабліва калі мы перажываем нягоды жыцця”, - напісаў у лісце Францішак, вядомы сваёй увагай да людзей, пазбаўленых волі. Святы Айцец скіраваў у лісце благаслаўленне вязням, просячы іх аб малітве.
KUL ужо больш за 10 гадоў вядзе вочнае навучанне зняволеных на першай і другой ступенях у галіне сямейных навук. 24 кастрычніка 2023 года ў Цэнтры пачалі новы навучальны год больш за 50 студэнтаў.
