Osservatore Romano пра доўгую кар'еру Джыны Лалабрыджыды

Марыя Валодзіна - Vatican News

Джына Лалабрыджыда нарадзілася ў італьянскім Субіяка. Разам са сваёй даўняй суперніцай Сафіяй Ларэн, яна стварыла вобраз італьянскай дзівы, а затым праславілася і на міжнародных здымачных пляцоўках.

У калектыўную свядомасць актрыса ўвайшла дзякуючы дзвюм ралям: гарэзлівай берсальершы ў карціне Хлеб, каханне і фантазія і феі з блакітнымі валасамі ў Пінокіа рэжысёра Луіджы Каменчыні.

Шырокую вядомасць Лалабрыджыдзе прынеслі ў 1950-е гады фільмы Ударыць у набат і Фанфан-цюльпан. Спробы надаць яе творчасці большай глыбіні рабілі рэжысёры Марыё Салдаці ў фільме Правінцыялка, Луіджы Зампа ў Рымлянке і Рэната Кастэлані ў Шалёным моры. Лалабрыджыда здымалася з такімі буйнымі акторамі, як Хамфры Богарт, Тоні Кёрціс, Рок Хадсон, Юл Брынер.

З сярэдзіны сямідзесятых гадоў актрыса вырашыла пакінуць кінематограф, каб паспяхова прысвяціць сябе фатаграфіі і скульптуры.

Джына Лалабрыджыда атрымала мноства прэстыжных узнагарод, сярод якіх вылучаецца прэмія Давід дзі Данатэла за кар'еру, прысуджаная ёй у 1996 годзе.