Пошук

Vatican News
Ілюстрацыйнае фота Ілюстрацыйнае фота  (2015 Getty Images)

Святы Пасад у ААН асудзіў выкарыстанне “робатаў-забойцаў”

Пастаянная місія Апостальскай Сталіцы пры структурах ААН і іншых міжнародных арганізацыях у Жэневе выступіла з заявай супраць выкарыстання аўтаматызаваных сістэм узбраенняў.

Аляксандр Панчанка – Vatican News

Ватыканская дэлегацыя прыняла ўдзел у пасяджэнні Групы ўрадавых экспертаў па сістэмах аўтаномных смяротных узбраенняў у перспектыве Канвенцыі ААН аб забароне і абмежаванні выкарыстання канкрэтных відаў звычайнай зброі.

Пастаянная місія нагадала, што “ад самага пачатку дыскусіі аб смяротных аўтаномных сістэмах узбраенняў Святы Пасад пастаянна падкрэсліваў, што праблемы, якія ўзнікаюць у сувязі са з’яўленнем новых тэхналогій у гэтай галіне, не абмяжоўваюцца сферай гуманітарнага права, але могуць мець сур’ёзныя наступствы для міра і стабільнасці”.

Апостальская Сталіца звярнула ўвагу на небяспеку выкарыстання невялікіх “дронаў-камікадзэ” у гарадскіх раёнах, што можа прыводзіць да высокіх рызыкаў для грамадзянскага насельніцтва.

“Без непасрэднага кантролю з боку чалавека такія сістэмы могуць памыляцца пры вызначэнні прадугледжаных мэтаў”, - адзначаецца ў заяве. Падкрэсліваецца таксама, што выкарыстанне “зграяў” аўтаномных узбраенняў можа прыводзіць да празмерных разбурэнняў і да іх невыбарачнага дзеяння, што супярэчыць міжнароднаму гуманітарнаму праву.

Дыпламаты Святога Пасаду звярнулі ўвагу на тое, што ўсё больш і больш навукоўцаў, інжынераў, даследчыкаў, вайскоўцаў, спецыялістаў па этыцы і шырокіх слаёў грамадзянскай супольнасці менавіта па этычных матывах выступаюць супраць пэўных праектаў, звязаных з выкарыстаннем штучнага інтэлекту ў ваеннай сферы.
 

07 жніўня 2021, 11:27