Пошук

Vatican News
Ілюстрацыйнае фота Ілюстрацыйнае фота 

Кардынал Паралін прэзентаваў Fratelli tutti на форуме ААН

Дзяржсакратар Яго Святасці прэзентаваў энцыкліку Францішка Fratelli tutti на форуме Арганізацыі Аб’яднаных Нацый. Кардынал П’етра Паралін прыняў удзел у анлайн-канферэнцыі на тэму “Братэрства, шматбаковасць і мір”.

Арганізатарам мерапрыемства выступіла місія Святога Пасаду пры ААН у супрацоўніцтве з Мальтыйскім ордэнам, Латэранскім універсітэтам і гуманітарнымі арганізацыямі.

Кардынал Паралін пракаментаваў папскую энцыкліку ў святле актуальных выклікаў, на якія павінна адказваць міжнародная супольнасць і ўся чалавечая сям’я. Іерарх падкрэсліў, што па-ранейшаму існуе шанс стварыць лепшы свет, але нельга паддавацца радыкальнаму эгаізму – вірусу, які найскладаней перамагчы.

Бліжэйшы супрацоўнік Святога Айца падкрэсліў, што папская энцыкліка з’яўляецца жывым і моцным дыпламатычным інструментам, які пракладвае шлях культуры братэрства, абавязковай для міжнародных адносін. Ватыканскі дыпламат, між іншым, закрануў тэму доступу да медыцынскай дапамогі, пытанне мігрантаў, гуманітарнай дапамогі і неабходнасці раззбраення.

Іерарх адзначыў, што салідарнасць, якая нараджаецца з братэрства, можа знішчыць падзелы на развітыя краіны і рэшту свету. Указаў таксама на неабхонасць адчування краінамі ўзаемнай адказнасці за дапамогу найбольш патрабуючым. У гэтым кантэксце іерарх заўважыў, што трэба абараняць правы мігрантаў і іх годнасць.

Кажучы пра неабходнасць раззбраення, кардынал Паралін назваў вялікай несправядлівасцю тое, што вялікія грошы ідуць на закупку зброі, а на гуманітарную дапамогу патрабуючым выдзяляюцца мізэрныя сумы. Такі вялікі разлад паміж пашырэннем культуры смерці і служэннем жыццю ватыканскі дыпламат назваў сусветным скандалам.
 

16 красавіка 2021, 09:32