Папа звярнуўся да карэйцаў у 70-ю гадавіну перамір’я
Аляксандр Амяльчэня – Vatican News
“Ушанаванне 70-годдзя спынення агню азначае не толькі адмову ад баявых дзеянняў, але таксама прапанову светлай будучыні прымірэння, братэрства і трывалай згоды для Карэйскага паўвострава і ўсяго свету”, - заўважыў Папа.
Тэкст прачытаў кардынал Лазарус Ю Хын-Сік, прэфект Дыкастэрыі па справах духавенства падчас Імшы ў сеульскай катэдры, дзе ўжо 30 гадоў штотыднёва цэлебруецца Эўхарыстыя за прымірэнне карэйскага народа. У гэтым жа храме і ў той жа інтэнцыі ў жніўні 2014 года Францішак узначаліў Імшу падчас свайго апостальскага візіту ў Паўднёвую Карэю.
“Я вам духоўна блізкі. Няхай гэты юбілей стане нагодай для біскупаў, духавенства, кансэкраваных асоб і свецкіх вернікаў вашай краіны аднавіць свой абавязак будаваць Валадарства Усемагутнага Бога, напоўненае справядлівасцю, мірам і радасцю ў Духу Святым”, - напісаў Пантыфік.
Ён адзначыў, што “шматлікія войны і ўзброеныя канфлікты, якія сёння закранаюць чалавечую сям’ю, а асабліва нашых найбольш уразлівых братоў і сясцёр, трагічна нагадваюць нам аб неабходнасці пастаяннай пільнасці ў абароне і прасоўванні справядлівасці і сяброўскага супрацоўніцтва ў супольнасцях і паміж народамі”.
“Я хацеў бы заахвоціць усіх карэйцаў заставацца прарокамі міру”, - звярнуўся Францішак. Ён нагадаў, што мір заўсёды грунтуецца “на павазе да кожнага чалавека, пашане да закону і агульнага дабра, да даручанага нам стварэння і да маральнага багацця, перададзенага папярэднімі пакаленнямі”.
Перамір'е падчас Карэйскай вайны было падпісана 27 ліпеня 1953 года ў Пханмунджоме.
