Пантыфік павіншаваў вернікаў Усходу з Пасхай і заклікаў да міру

Марыя Валодзіна – Vatican News

“Жадаю выказаць сваю блізкасць да ўсіх братоў і сёстраў, асабліва на Усходзе, якія сёння святкуюць Вялікдзень. Дарагія, хай Уваскрослы Пан будзе з вамі і напоўніць вас Святым Духам! Шчаслівага Вялікадня ўсім вам!” - пажадаў Францішак.

“На жаль, у рэзкім кантрасце з Велікодным пасланнем, войны працягваюць сеяць смерць у жудасных формах. Мы засмучаны гэтымі зверствамі і молімся за ахвяр, просячы Бога, каб свет перажываў не жахі гвалтоўнай смерці ад рук чалавека, а здзіўленне жыцця, якое Ён дае і абнаўляе Сваёй ласкай!” - сказаў Святы Айцец.

“Я з непакоем сачу за падзеямі, якія адбываюцца ў Судане. Адчуваю блізкасць да суданскага народа і заклікаю маліцца, каб была складзена зброя і ўзяў верх дыялог, каб аднавіўся сумесны шлях да міру і згоды”, - падкрэсліў Пантыфік.

“Я думаю пра нашых братоў і сясцёр, якія ў Расіі і ва Украіне сёння святкуюць Вялікдзень. Хай Пан будзе побач з імі і дапаможа ім заключыць мір”, - пажадаў Папа.