Папа: адпачынак – нагода ўмацаваць лучнасць з людзьмі і Богам

Аляксандр Панчанка - Vatican News

“Праз некалькі дзён мы будзем святкаваць Унебаўзяцце Найсвяцейшай Панны Марыі. Няхай Яна, увайшоўшы ў нябесную хвалу, падтрымлівае нашу адвагу ў гэты час пілігрымавання, якое мы яшчэ павінны здзейсніць тут, на зямлі, і няхай дапаможа пажылым людзям даваць радаснае сведчанне іх веры і надзеі”, - сказаў Пантыфік, вітаючы французскіх пілігрымаў падчас агульнай аўдыенцыі, якая 10 жніўня 2022 года прайшла ў Ватыкане.

Францішак нагадаў, што Панна Марыя, пакутавала разам з Езусам пад крыжам, а потым, як першае стварэнне, мела магчымасць увайсці за Ім у Яго нябесную хвалу. “З неба Марыя глядзіць на кожнага з нас з матчынай любоўю. Давайце скіруем да Яе наш позірк, каб прывяла нас да збаўлення”, - заклікаў Святы Айцец вернікаў з Германіі.

Звяртаючыся да польскіх католікаў, Папа пажадаў, каб перыяд канікул стаў для іх часам адпачынку, а таксама нагодай для ажыўлення сувязі з Богам і людзьмі. “Не занядбоўвайце штодзённую малітву, удзел у нядзельнай Эўхарыстыі і дзяленне часу з іншымі. Сузірайце прыгажосць стварэння, праслаўляючы любоў Стварыцеля. Няхай вам спадарожнічае Яго благаслаўленне”, - пажадаў Францішак.