Папа звярнуў увагу на важныя касцёльныя падзеі

Аляксандр Амяльчэня - Vatican News

Папа нагадаў пра суботнюю беатыфікацыю Луіджы Ленцыні, якая прайшла ў Модэне. Гэты мучанік за веру загінуў у 1945 годзе за тое, што ў атмасферы нянавісці і канфліктаў указаў на хрысціянскія каштоўнасці як на галоўны шлях жыцця. “Няхай гэты святар, пастыр па сэрцы Хрыста, веснік праўды і справядлівасці, дапаможа нам з неба з любоўю і шчырасцю сведчыць аб Евангеллі”, - звярнуўся Пантыфік.

Ён нагадаў, што ў нядзелю перад урачыстасцю Спаслання Духа Святога ў Касцёле адзначаецца Сусветны дзень камунікацыі, сёлетняя тэма якога – “Слухайце!”. “Уменне слухаць, акрамя таго, што застаецца першым жэстам міласэрнасці, з'яўляецца яшчэ і першым незаменным элементам дыялогу і добрай камунікацыі: умець слухаць, дазваляць іншым сказаць усё, не перарываць сказ і ўмець слухаць вушамі і сэрцам. Жадаю ўсім расці ва ўменні слухаць сэрцам”, - сказаў Папа.

У Нацыянальны дзень дапамогі ў пакутах, які адзначаецца ў Італіі, Святы Айцец заклікаў памятаць, што хворы заўсёды важнейшы за яго хваробы.

Папа анансаваў на 31 мая 2022 года супольную з многімі санктуарыямі малітву на Ружанцы за мір у свеце. Ён асабіста ўзначаліць набажэнства ў 18.00 у базыліцы Санта-Марыя-Маджорэ. “Запрашаю вернікаў, сем’і і супольнасці далучыцца да гэтага закліку, каб атрымаць ад Бога дар, якога свет чакае праз заступніцтва Каралевы міру”, - звярнуўся Пантыфік.