Пошук

Vatican News
Францішак на экуменічнай сустрэчы ў Браціславе Францішак на экуменічнай сустрэчы ў Браціславе  (Vatican Media)

Пантыфік распачаў візіт у Славакію з экуменічнай сустрэчы

Папа распачаў другі этап свайго 34-га Апостальскага падарожжа, у рамках якога наведвае Венгрыю і Славакію. 12 верасня 2021 г. каля 15.30 па сярэднееўрапейскім часе ён прыбыў з Будапешта ў Браціславу.

Аляксандр Панчанка – Vatican News

Пасля цырымоніі прывітання ў браціслаўскім аэрапорце і кароткай сустрэчы з Прэзідэнтам Славакіі Зузанай Чапутавай Францішак накіраваўся ў Апостальскую нунцыятуру, дзе сустрэўся з членамі Экуменічнай рады Славакіі, у якую ўваходзяць прадстаўнікі адзінаццаці мясцовых рэлігійных супольнасцей, а каталіцкі епіскапат мае статус назіральніка.

У сваёй прамове Францішак нагадаў пра шматгадовыя атэістычныя ганненні ў перыяд панавання камуністычнага рэжыма, калі “рэлігійная свабода душылася або жорстка пераследавалася”. Пасля падзення жалезнай заслоны свабода вярнулася. “Цяпер вас аб’ядноўвае супольны шлях, на якім вы адкрываеце наколькі цудоўна, але таксама і складана жыць верай у свабодзе”, - дадаў ён.

Папа звярнуў увагу на небяспеку вяртання да яшчэ горшага рабства – унутранага. Ён спаслаўся на Легенду пра вялікага інквізітара з рамана Дастаеўскага Браты Карамазавы, у якой Езус вярнуўся на зямлю і быў абвінавачаны ў тым, што даў людзям зашмат свабоды. Хрыстус настойваў на важнасці свабоды, у той час як людзі прагнулі “хлеба і невялікай колькасці нечага іншага".

Паводле Францішка, такая небяспека ўзнікае калі сітуацыя нармалізуецца і людзі спыняюцца да дасягнутым, імкнуцца захаваць спакойнае жыццё. Папа заклікаў хрысціян не трапляць у такую пастку камфортнага рабства, а быць руплівымі ў прапаведванні і жыць евангельскай свабодай.

Пантыфік звярнуў увагу на актуальнасць прыкладу святых Кірыла і Мятода, заклікаў хрысціян быць з’яднанымі паміж сабой і працаваць над прымірэннем разнастайнасцей у Святым Духу. Ён адзначыў важнасць спалучэння малітоўнага сузірання, асабліва ўласцівага славянскім народам, і актыўнага дзеяння, у прыватнасці на карысць самых бедных. “Супольныя дабрачынныя ініцыятывы могуць адкрыць перад намі больш шырокія гарызонты і дапамагчы дасягнуць большага прагрэсу ў пераадоленні забабонаў і непаразуменняў”, - сказаў ён.

На заканчэнне сустрэчы Папа выказаў спадзяванне на тое, што ўсе хрысціяне аднойчы змогуць аб’яднацца за эўхарыстычным сталом Пана, а пакуль гэта немагчыма, будуць разам прымаць Езуса, служачы Яму ў бедных.
 

12 верасня 2021, 17:22