Пошук

Vatican News
Папа з дэлегацыяй санктуарыя Маці Божай Луханскай Папа з дэлегацыяй санктуарыя Маці Божай Луханскай  (AFP or licensors)

Святы Айцец: Марыя збірае ў сваіх абдымках усіх нас

“Марыя збірае і абдымае нас”, - падкрэсліў Папа ў відэапасланні з нагоды 40-й пілігрымкі ў санктуарый Маці Божай Луханскай у аргентынскім горадзе Сэнтэнарыё.

У сувязі ў пандэміяй трохдзённае духоўнае падарожжа праходзіла ў фармаце відэаканферэнцыі. “Часам, і не толькі часам, шлях становіцца складаным. У гэты перыяд пандэміі і шматлікіх пагроз для здароўя, моцнага страху, вялікіх нястачаў, ён з’яўляецца яшчэ больш цяжкім. Таму мы ўсе патрабуем абдымкаў Марыі”, - сцвердзіў Пантыфік.

Спасылаючыся на сведчанні некаторых жанчын, Францішак заўважыў, што адно з галоўных заданняў маці заключаецца ў тым, каб сабраць разам сваіх дзяцей, нават калі яны вельмі розныя. “Так Багародзіца робіць і з намі. Мы ўсе розныя, але Яна, Маці, збірае ў сваіх абдымках усіх нас”, - запэўніў Святы Айцец.

Віртуальная пілігрымка ў аргентынскі марыйны санктуарый завяршылася 27 верасня 2020 г. св. Імшой, якая трансліравалася на старонках мясцовай дыяцэзіі ў сацыяльных сетках.

Маці Божая Луханская з’яўляецца апякункай Аргентыны, Уругвая і Парагвая. Яе цудатворная фігурка захоўваецца ў базыліцы Маці Божай у мястэчку Лухан, у правінцыі Буэнас-Айрэс у Аргентыне. 60-сантыметровая тэракотавая статуэтка была зроблена каля 1630 г. У 1887 г. яна была каранавана папскімі каронамі. 
 

28 верасня 2020, 10:16