Пошук

Vatican News

Малітва і благаслаўленне Urbi et Orbi: трансляцыя на мове жэстаў

Францішак узначаліць перад базылікай святога Пятра адмысловае набажэнства аб выбаўленні свету ад каранавіруса. Папа запрашае ўсіх сабрацца для сумеснай малітвы праз СМІ.

Трансляцыя распачнецца 27 сакавіка ў 18.00 (у 20.00 па мінскім часе). Ля цэнтральнага ўваходу ў ватыканскую базыліку будуць змешчаны абраз Маці Божай “Збаўленне рымскага народа” (Salus Populi Romani) і цудатворны крыж з рымскага касцёла Сан-Марчэла-аль-Корса. Пасля чытання Святога Пісання, Пантыфік прамовіць казанне. Найсвяцейшы Сакрамэнт будзе выстаўлены ў атрыуме сабора. Малітва завершыцца надзвычайным благаслаўленнем Urbi et orbi з магчымасцю атрымаць поўны адпуст. Набажэнства працягнецца каля гадзіны.

Падчас трансляцыі будзе весціся сінхронны пераклад з італьянскай на англійскую, французскую, іспанскую, партугальскую, нямецкую, арабскую і кітайскую мовы. Для людзей з праблемамі слыху ўсё будзе дубліравацца на мове жэстаў.

Vatican Media Live

Дзве каталіцкія святыні будуць суправаджаць набажэнства не выпадкова. Абраз Маці Божай атрымаў назву “Збаўленне рымскага народа” пасля таго, як папа Грыгорый І у 590 г. пранёс яго ў працэсіі па Рыме падчас эпідэміі маравой пошасці, якая ў выніку адступіла. Затым рымляне неаднойчы прасілі ля яго выбаўлення ад рознага роду катастроф. Старажытны драўляны круцыфікс, які зараз захоўваецца ў касцёле Сан-Марчэла-аль-Корса, у 1522 г. пранеслі ў працэсіі па вуліцах Рыма, молячыся аб ратаванні ад страшэннай эпідэміі чумы.

27 сакавіка 2020, 12:16