Пошук

Vatican News
Папа Францішак. Ілюстрацыйнае фота Папа Францішак. Ілюстрацыйнае фота  (AFP or licensors)

Праграма публічных цэлебрацый Папы на бліжэйшыя месяцы

12 лютага 2020 г. Служба папскіх літургічных цэлебрацый абнародавала праграму публічных набажэнстваў з удзелам Святога Айца на бліжэйшыя месяцы.

У Папяльцовую сераду, 26 лютага, Францішак пройдзе ў традыцыйнай пакутнай працэсіі ад рымскага бэнэдыктынскага касцёла св. Анзэльма да дамініканскай базылікі св. Сабіны на Авенцінскім пагорку, дзе ўзначаліць Эўхарыстыю з абрадам пасыпання галоў попелам.

Велікапостныя рэкалекцыі для Папы і супрацоўнікаў Рымскай курыі сёлета пройдуць з 1 па 6 сакавіка, як звычайна, у Арыча, у 30 км ад Рыма. У пятніцу 20 сакавіка Пантыфік правядзе пакутнае набажэнства ў ватыканскай базыліцы св. Пятра.

У Пальмовую нядзелю, 5 красавіка, Папа ўзначаліць св. Імшу на плошчы св. Пятра, падчас якой адбудзецца працэсія з пальмовымі галінкамі. Вялікі чацвер, 9 красавіка, распачнецца для Пантыфіка сустрэчай са святарамі на Эўхарыстыі ў ватыканскай базыліцы. Вечарам 10 красавіка там жа Францішак будзе цэлебраваць набажэнства Вялікай пятніцы, пасля якога накіруецца ў рымскі Калізей, дзе возьме ўдзел у Крыжовым шляху.

У суботу, 11 красавіка, Святы Айцец правядзе Імшу Пасхальнай Вігіліі ў базыліцы св. Пятра. У Вялікдзень, 12 красавіка, ён узначаліць святочную Эўхарыстыю на плошчы св. Пятра, пасля якой, з цэнтральнай лоджыі ватыканскай базылікі, скіруе пасланне міру і ўдзеліць благаслаўленне “Urbi et Orbi”. Таксама праз тыдзень, 19 красавіка, у Нядзелю Божай Міласэрнасці, Францішак будзе цэлебраваць св. Імшу на ватыканскай плошчы.

Навіна ў фармаце аўдыё
13 лютага 2020, 11:13