Пошук

Vatican News

Францішак: Бог збаўляе не моцай свету, але слабасцю крыжа

Калі мы здолеем адкрыцца на ўсеагульнае дабро, на ўсёабдымны позірк Бога, то, дзякуючы Яго ласцы, зможам пераадолець падзелы, якія перажывае хрысціянства, перакананы Святы Айцец.

25 студзеня 2020 г., у свята Навяртання св. Паўла, у рымскай базыліцы св. Паўла за Мурамі Пантыфік узначаліў урачыстыя Нешпары з нагоды заканчэння Тыдня малітвы аб еднасці хрысціян. Па традыцыі, у гэтым набажэнстве прынялі ўдзел прадстаўнікі розных хрысціянскіх канфесій.

Францішак пракаментаваў фрагмент з кнігі Дзеяў Апосталаў, які апавядае пра рызыкоўнае падарожжа ў Рым карабля з вязнямі, сярод якіх быў і святы Павел (Дз 27). На думку Папы, гэты тэкст “расказвае і пра нашае экуменічнае падарожжа ў напрамку еднасці, якой так палка жадае Бог”.

З евангельскага ўрыўка вынікае, па-першае, той факт, што “часта менавіта самыя слабыя нясуць найбольш важнае пасланне паратунку”. “Таму што так спадабалася Богу: збаўляць нас не моцай свету, але слабасцю крыжа (пар. 1 Кар 1, 20-25)”, - заўважыў Папа.

“Таму, як вучні Езуса, мы павінны быць уважлівымі, каб не аказацца прывабленымі мірской логікай, і павінны прыслухоўвацца да малых і бедных, таму што Бог любіць скіроўваць сваё пасланне праз іх – больш падобных да Яго Сына, Які стаўся чалавекам”, - сказаў Святы Айцец.

Па-другое, аповед пра марское падарожжа Паўла нагадвае пра тое, што “Божым прыярытэтам з’яўляецца збаўленне ўсіх”. У якасці пацвярджэння Францішак нагадаў пасланне, з якім у найбольш цяжкую хвіліну да Паўла прыйшоў анёл: “Бог падараваў табе ўсіх, хто плыве з табою”.

“Для нас гэта запрашэнне не прысвячаць сябе выключна нашым супольнасцям, але адкрыцца на ўсеагульнае дабро, на ўсёабдымны позірк Бога, Які ўцелавіўся, каб абняць увесь чалавечы род, памёр і ўваскрос дзеля збаўлення ўсіх. Калі дзякуючы Яго ласцы мы засвоім Яго бачанне, то зможам пераадолець нашыя падзелы”, - выказаў упэўненасць Францішак.

Па-трэцяе, працягнуў ён, з кнігі Дзеяў Апосталаў даведваемся, што жыхары Мальты, дзе ў выніку караблекрушэння апынуўся св. Павел з іншымі вязнямі, былі да іх “надзвычай ласкавыя” (Дз 28, 2), што засяроджвае нашую ўвагу на цэнтральнай тэме сёлетняга Тыдня малітвы аб еднасці хрысціян – гасціннасці.

“Гасціннасць належыць традыцыі хрысціянскіх супольнасцей і сем’яў. Нашыя продкі сваім прыкладам навучылі нас, што на стале ў хрысціянскай сям’і заўсёды знойдзецца талерка супу для падарожнага сябра або для патрабуючага, што стукае ў дзверы. (...) Давайце не губляць, але наадварот, адраджаць гэтыя звычаі, якія маюць смак Евангелля”, - заклікаў Францішак на заканчэнне свайго экуменічнага разважання.

Навіна ў фармаце аўдыё
25 студзеня 2020, 19:25