Пошук

Vatican News
Папа падчас сустрэчы з супрацоўнікамі Рымскай курыі Папа падчас сустрэчы з супрацоўнікамі Рымскай курыі  (Copyright 2019 The Associated Press. All rights reserved)

Святы Айцец заклікаў Рымскую курыю не баяцца перамен

Папа перакананы, што Рымскай курыі патрэбныя перамены. Гэта дапаможа лепшаму абвяшчэнню Евангелля дэхрысціянізаванаму свету і перамозе над зацвярдзеласцю і страхам.

21 снежня 2019 г. Святы Айцец прыняў на традыцыйнай аўдыенцыі з нагоды Божага Нараджэння членаў Рымскай курыі. У прамове да сваіх бліжэйшых супрацоўнікаў ён падкрэсліў, што ўрачыстасць Нараджэння Пана з’яўляецца нагодай для прыняцця Божай запаведзі: “Як Я палюбіў вас, так і вы любіце адзін аднаго”.

Пантыфік заўважыў, што зараз мы жывём у няпросты час эпахальных перамен. Спасылаючыся на словы св. Генры Ньюмэна, ён падкрэсліў, што перамены павінны, у першую чаргу, тычыцца ўнутранага пераўтварэння.

Гаворачы пра рэформу Рымскай курыі, Францішак падкрэсліў, што яна праводзіцца з павагай да ўсяго добрага, што было ў яе складанай гісторыі. Галоўны крытэрый тут – гэта евангелізацыя, што і будзе адлюстравана ў новай Апостальскай канстытуцыі аб Рымскай курыі пад назвай “Praedicate evangelium”.

Пантыфік асаблівым чынам звярнуўся да кіраўніцтва і супрацоўнікаў дыкастэрый, у кампетэнцыі якіх знаходзяцца пытанні евангелізацыі. Дзве з гэтых устаноў – Кангрэгацыя Веравучэння і Кангрэгацыя Евангелізацыі Народаў, – былі заснаваны, калі свет быў падзелены на дзве часткі: хрысціянскі і той, які трэба было евангелізаваць. Зараз, паводле Папы, такое дзяленне ўжо не актуальна: людзі, якія не сустрэліся з Евангеллем, жывуць не толькі за межамі Еўропы, але ўсюды. Гэта тычыцца асабліва вялікіх гарадоў.

“У вялікіх гарадах нам патрэбны іншыя “карты”, іншыя парадыгмы, якія дапамогуць змяніць лад нашага мыслення і дзейнасці: мы больш не жывём у хрысціянскім свеце!”, - падкрэсліў Францішак. Хрысціяне больш не з’яўляюцца адзінымі, першымі і галоўнымі “вытворцамі культуры”, а гэта патрабуе змены душпастырскага мыслення, - дадаў Святы Айцец.

Звяртаючыся да кіраўніцтва Дыкастэрыі па камунікацыі, Папа заўважыў, што неабходна даць адпаведныя адказы на актуальныя выклікі, якія ставіць лічбавая культура. Яна глыбока паўплывала на ўспрыманне часу і прасторы, пазначана развіццём крытычнага пачуцця, аддае перавагу вобразам, а не словам.

Францішак папярэдзіў, што ў ходзе рэформы непазбежнай спакусай з’яўляецца “замкнёнасць у мінулым, нават з выкарыстаннем новых фармуліровак, бо яно больш надзейнае, знаёмае і, вядома, менш канфліктнае”. “Тут трэба быць пільнымі, каб не паддацца спакусе зацвярдзеласці. Яна нараджаецца па прычыне страху перад пераменамі і прыводзіць да сеяння перашкод і бар’ераў на глебе агульнага дабра, ператвараючы яе ў поле, замініраванае некамунікабельнасцю і нянавісцю”, - заўважаў Папа. Ён дадаў, што за зацвярдзеласцю заўсёды стаіць нейкая неўраўнаважанасць.

Святы Айцец падкрэсліў, што Божае Нараджэнне – гэта свята любові Бога да нас. “Гэта Боская любоў натхняе, накіроўвае і карэкціруе перамены, перамагаючы чалавечы страх пакінуць “надзейнае”, каб зноў скіравацца насустрач “таямніцы”, - сказаў Папа на заканчэнне аўдыенцыі для супрацоўнікаў Рымскай курыі.

Навіна ў фармаце аўдыё
21 снежня 2019, 13:59