Пошук

Vatican News
Папа Францішак і Генсек ААН Антоніу Гутэрыш Папа Францішак і Генсек ААН Антоніу Гутэрыш  (Vatican Media)

Францішак і Генеральны сакратар ААН запісалі сумесны відэазварот

20 снежня 2019 г. Папа прыняў у Ватыкане Генеральнага сакратара Арганізацыі Аб’яднаных Нацый Антоніу Гутэрыша. На заканчэнне сустрэчы яны запісалі сумесны відэазварот.

“Мы не можам, мы не павінны адварочвацца ў іншы бок перад абліччам несправядлівасці, няроўнасці, скандалу голаду ў свеце, беднасці, смерці дзяцей ад недахопу вады, ежы, патрэбнай медыцынскай дапамогі”, - гаворыцца ў відэапасланні.

Святы Айцец і Генеральны сакратар ААН заклікалі не адварочвацца ў іншы бок перад абліччам рознага роду злоўжыванняў адносна непаўналетніх. “Мы павінны разам змагацца з гэтай бядой”, - сказалі яны.

У відэазвароце гучыць заклік не закрываць вачэй на праблемы людзей, якія па прычыне канфліктаў, насілля, кліматычных змен, “пакідаюць свае землі і часта адпраўляюцца насустрач сумнаму лёсу”, не заставацца раўнадушнымі перад абліччам нападаў на чалавечую годнасць, на жыццё ненароджаных дзяцей і людзей, якія патрабуюць дагляду.

“[Мы не можам, мы не павінны адварочвацца ў іншы бок, калі вернікі розных рэлігій пераследуюцца ў розных частках свету. Божую помсту выклікае выкарыстанне рэлігіі для распальвання нянавісці, насілля, прыгнёту, экстрэмізму і сляпога фанатызму, а таксама прымус да выгнання і маргіналізацыі]”

, - сцвердзілі яны.

Пантыфік і Генсек ААН асудзілі войны, а таксама заклікалі да дыялогу паміж людзьмі і народамі, да выкарыстання шматбаковай дыпламатыі дзеля будавання лепшага свету, да прызнання адно аднаго членамі адзінага чалавецтва, да клопату пра навакольнае асяроддзе, чаму павінна садзейнічаць змяншэнне шкодных выкідаў у атмасферу і інтэгральная экалогія.

“Пачуем голас шматлікіх маладых людзей, якія дапамагаюць нам усвядоміць тое, што адбываецца сёння ў свеце, і просяць нас стаць сейбітамі міру і будаўнікамі – разам, а не ў адзіночку – больш чалавечнай і справядлівай цывілізацыі. Няхай Божае Нараджэнне сваёй сапраўднай прастатой нагадвае пра тое, што любоў – гэта тое, што па-сапраўднаму каштоўнае ў жыцці”, - закончылі сумесны відэазварот Папа і Генеральны сакратар Арганізацыі Аб’яднаных Нацый.

Відэазварот Папы і Генсека ААН
Навіна ў фармаце аўдыё
20 снежня 2019, 14:18