Пошук

Vatican News
Папа Францішак. Ілюстрацыйнае фота Папа Францішак. Ілюстрацыйнае фота  (Vatican Media)

Папа пра актуальнасць педагогікі св. Жана Батыста Сальскага

Францішак прыняў на аўдыенцыі членаў Таварыства Братоў Хрысціянскіх Школ. Сустрэча прайшла 16 мая 2019 г. з нагоды 300-годдзя смерці заснавальніка супольнасці – св. Жана Батыста Сальскага.

Пантыфік нагадаў пра актуальнасць паслання нябеснага апекуна настаўнікаў, “геніяльнага і творчага наватара”, “піянера ў сферы адукацыі”, якім быў св. Жан Батыст. Застаючыся перакананым, што “адукацыя – гэта права ўсіх, у тым ліку і бедных”, ён адмовіўся ад багатай спадчыны сваёй сям’і і прысвяціў сябе асветніцай працы сярод самых бедных слаёў насельніцтва, заўважыў Папа.

“Каб рэалізаваць свае ідэалы, ён заснаваў супольнасць, у якую ўваходзілі толькі свецкія, з перакананнем, што Касцёл не можа заставацца ў баку ад сацыяльных супярэчнасцей часу, што павінен з імі лічыцца”, - сказаў Святы Айцец. Ён падкрэсліў, што новае Таварыства складалася з кансэкраваных асоб, цалкам пранікнутых сацыяльнай рэчаіснасцю сваёй эпохі.

Рэпартаж з папскай аўдыенцыі

Св. Жан Батыст Сальскі звяртаў асаблівую ўвагу на падрыхтоўку настаўнікаў, падкрэсліваючы, што “навучанне павінна быць не толькі прафесіяй, але і місіяй”. Акрамя таго, ён увёў важныя змены ў сам педагагічны працэс.

“Ён замяніў лацінскую мову, на якой тады звычайна праходзіла навучанне, на французскую; падзяліў вучняў на аднародныя па ўспрыняцці групы, для больш эфектыўнай працы; стварыў семінарыі для вясковых настаўнікаў, гэта значыць для маладых людзей, якія хацелі стаць настаўнікамі, не ўступаючы ў ніводную з манаскіх супольнасцей; заснаваў нядзельныя школы для дарослых і два пансіянаты: адзін для маладых злачынцаў, а другі – для былых вязняў”, - нагадаў Папа.

Французскі святы “марыў пра школу, адкрытую для ўсіх”, таму не пазбягаў “экстрэмальных адукацыйных патрэб, увёўшы метад рэабілітацыі праз школу і працу”. Ён развіваў “карэкцыйную педагогіку”, якая, “насуперак звычаям той эпохі”, прадугледжвала забеспячэнне моладзі, што знаходзілася ў турме, магчымасцю вучобы і працы.

“Дарагія духоўныя сыны св. Жана Батыста Сальскага, заклікаю вас паглыбляць і наследаваць прыклад яго адданасці апошнім і адрынутым. Па слядах яго апостальскага сведчання, будзьце галоўнымі героямі “культуры ўваскрасення”, асабліва ў экзістэнцыяльным кантэксце, дзе пануе культура смерці”, - заклікаў сваіх гасцей Папа.

Пантыфік заклікаў Братоў Хрысціянскіх Школ з увагай ставіцца да людзей, якія жывуць у сітуацыі заняпаду, нястачы і беднасці, быць гатовымі даць ім надзею.

Навіна ў фармаце аўдыё
16 мая 2019, 15:30