Cerca

Vatican News
Папа падчас Эўхарыстыі ў Доме св. Марты Папа падчас Эўхарыстыі ў Доме св. Марты  (Vatican Media)

Пантыфік: д’ябал не церпіць вобразу Бога ў чалавеку

Трывае пераслед не толькі хрысціян, але ўсіх людзей праз “культурную каланізацыю, войны, голад, рабства”, сказаў Папа падчас ранішняй Эўхарыстыі, якую цэлебраваў 1 чэрвеня 2018 г. у Доме св. Марты.

Спасылаючыся на літургічнае чытанне з Першага паслання св. Пятра (4,7-13), Пантыфік заўважыў, што выпрабаванні, звязаныя з пераследам, “складаюць частку хрысціянскага жыцця”, з’яўляюцца “благаслаўленнем”, бо нават сам Езус падвяргаўся пераследу “за сваю вернасць Айцу”. Ён нагадаў пра вялікую колькасць сучасных мучанікаў, асобаў, якіх пераследуюць за любоў да Хрыста.

“У многіх краінах хрысціяне не маюць правоў. Калі носіш крыж – пойдзеш у турму. Ёсць людзі, асуджаныя на смерць за тое, што з’яўляюцца хрысціянамі. Але гэта не робіць навіны. Таму ў выпусках навін, у газетах не гаворыцца пра такія рэчы. Тым не менш, хрысціяне падвяргаюцца ганенням”

- сказаў Святы Айцец.

Францішак звярнуў увагу таксама на пераслед іншага роду. Паводле яго слоў, кожны мужчына і жанчына падвяргаецца ганенням “за тое, што з’яўляецца жывым вобразам Бога”, і правакуе гэтыя ганенні д’ябал.

“Ад самага пачатку ён спрабаваў зрабіць гэта – можам пачытаць у Кнізе Быцця! – знішчыць гармонію паміж мужчынам і жанчынай, якую Пан стварыў. Гэта гармонія паходзіць ад быцця вобразам і падабенствам Бога. І ён здолеў зрабіць гэта з дапамогай падману, спакушэння, з дапамогай гэтай зброі, якую выкарыстоўвае. Ён заўсёды робіць так”, - сказаў Пантыфік.

“Таксама і сёння ёсць сіла, ёсць лютасць, накіраваная супраць чалавека, бо інакш немагчыма патлумачыць гэту растучую дэструктыўную хвалю, накіраваную на мужчыну і жанчыну, на чалавецтва”

- лічыць Святы Айцец.

Папа падкрэсліў, што часткай ганенняў супраць чалавека з'яўляецца голад, які прыводзіць да шматлікіх пакут і смерцяў, нягледзячы на тое, што ў свеце дастаткова ежы; эксплуатацыя, розныя формы рабства і катаванняў; культурная каланізацыя, навязванне рэчаў, якія вядуць да смерці; войны і звязаная з імі вытворчасць зброі.

“Імперыі працягваюць ганенні сёння. Мы не павінны быць наіўнымі. Сёння ў свеце не толькі хрысціяне падвяргаюцца пераследу, а ўсе людзі, мужчына і жанчына, таму што бацька кожнага пераследу не церпіць таго, што існуе вобраз і падабенства Бога. Ён нападае і знішчае гэты вобраз. Зразумець гэта нялёгка. Трэба шмат маліцца, каб зразумець гэта”, - сказаў Францішак на заканчэнне сваёй гаміліі.

Навіна ў фармаце аўдыё
01 чэрвеня 2018, 12:45
Чытаць усё >