Кардынал Чэрны: сальвадорскія мучанікі служылі цэласнаму развіццю
Аляксандр Панчанка – Vatican News
Законнікі на чале з ксяндзом Ігнасіа Элакурыя былі сусветна прызнанымі навукоўцамі і працавалі ў езуіцкім Цэнтральнаамерыканскім універсітэце імя Хасэ Сімяонэ Каньяса, дзе праводзілі даследаванні ў галіне сацыялогіі і іншых навук, якія паказвалі драматычныя наступствы вайны і беднасці ў краіне. Прэфект Дыкастэрыі па служэнні інтэгральнаму развіццю чалавека скіраваў свой спецыяльны ліст супольнасці гэтай навучальнай установы.
Кардынал падкрэсліў, што гэтыя езуіты і іх паплечнікі з’яўляюцца “мучанікамі таго дару, якім быў Другі Ватыканскі Сабор”, таму што “сваім жыццём і смерцю яны выканалі заклік Сабору і 32-й Генеральнай кангрэгацыі, стварыўшы вялікую евангелізацыйную, адукацыйную і сацыяльную ініцыятыву, якой стаў Цэнтральнаамерыканскі ўніверсітэт”.
Ватыканскі іерарх падкрэсліў, што мучанікі з’яўляюцца прыкладам служэння інтэгральнаму развіццю чалавека і таму застаюцца асаблівым натхненнем для Дыкастэрыі, якую ён узначальвае.
Езуіты загінулі ў ноч на 16 лістапада 1989 года, калі на кампус напала падраздзяленне ўрадавых войскаў. У тыя гады ў Сальвадоры трывала кровапралітная грамадзянская вайна паміж правымі ўладамі, звязанымі з арміяй, і рэвалюцыйнай групоўкай Фронту нацыянальнага вызвалення імя Фарабунда Марці. Законнікаў абвінавацілі ў дапамозе паўстанцам і жорстка забілі. Падчас нападу загінула таксама іх работніца Эльба Рамас і яе 16-гадовая дачка Селіна.
Кровапраліцце ўзрушыла міжнародную грамадскасць, але следства так і не прыйшло да раскрыцця ўсёй праўды. Справа была спынена ў 2000 годзе. Праз дваццаць гадоў Злучаныя Штаты Амерыкі ўвялі санкцыі ў дачыненні да 13 ваенных афіцэраў, прызнаных адказнымі за гэтае забойства.
