Пошук

Vatican News
Патрыярх Халдэйскай Царквы, кардынал Луіс Рафаэль Сако Патрыярх Халдэйскай Царквы, кардынал Луіс Рафаэль Сако  (ANSA)

Халдэйскі Патрыярхат патлумачыў матывы змены сваёй назвы

Некалькі дзён таму Сінод Халдэйскай Царквы выключыў з назвы Патрыярхату спасылку на Вавілон, паколькі, як сцвердзілі яго ўдзельнікі, гэта не мела гістарычнага абгрунтавання.

Аляксандр Амяльчэня - Vatican News

Такое тлумачэнне змяшчаецца ў заяве Патрыярха, апублікаванай 23 жніўня 2021 г., у адказ на шматлікія пытанні і нават палемічныя каментары, якія з'явіліся неўзабаве пасля Сінода.

Падчас сінадальнай сесіі, якая прайшла ў Багдадзе 9-14 жніўня 2021 г. пад старшынствам Патрыярха, кардынала Луіса Рафаэля Сако, іерархі усходне-каталіцкай Царквы, абмеркавалі многія важныя тэмы. Адной з іх стала змена афіцыйнай назвы супольнасці, раней вядомай як Вавілонскі Халдэйскі Патрыярхат – цяпер гэта будзе проста Халдэйскі Патрыярхат.

Патрыярхат звярнуў увагу на тое, што шмат крытыкі зыходзіць з боку халдэйскай дыяспары, у той час як у самім Іраку "ніхто не выступае супраць рашэння Сінода". Было падкрэслена, у прыватнасці, што Вавілон быў сталіцай Вавілонскай імперыі, але "ён ніколі не быў сталіцай епіскапа або Патрыярха, а сёння гэта іракскі мусульманскі горад". Папярэдняя назва Патрыярхату была пазбаўлена якой-кольвечы гістарычнай базы па розных прычынах. У патрыяршай заяве звяртаецца ўвага на тое, што калі хрысціянства дасягнула Месапатаміі, Вавілонія ўжо доўгі час была ў руінах.

Да стварэння Халдэйскага Патрыярхату, звязанага сувязямі іерархічнай супольнасці з Наступнікам св. Пятра, прывялі складаныя гістарычныя абставіны сярэдзіны XVI ст., якія паспрыялі таму, што частка Асірыйскай Царквы Усходу пацвердзіла поўную камунію з Рымам. Спасылка на Вавілон была змешчана ў назве толькі ў 1724 г.
 

26 жніўня 2021, 10:25