Пошук

Vatican News
Епіскапат Германіі падчас пленарнага пасяджэння. Ілюстрацыйнае фота Епіскапат Германіі падчас пленарнага пасяджэння. Ілюстрацыйнае фота  (ANSA)

Біскупы Германіі прыедуць у Ватыкан для кансультацый

Прэфект Кангрэгацыі па справах духавенства, кардынал Бэньяміна Стэла запрасіў у Рым прадстаўнікоў нямецкага епіскапату. Тэмай стане так званы Сінадальны шлях.

Нагадаем, што ініцыятыва Касцёла ў Германіі выклікала рэакцыю Кангрэгацыі ў выглядзе інструкцыі: “Душпастырскае навяртанне парафіяльнай супольнасці на службе евангелізацыйнай місіі Касцёла”, апублікаванай 20 ліпеня 2020 г.

На сустрэчу не быў запрошаны Цэнтральны камітэт нямецкіх католікаў, які з’яўляецца суарганізатарам Сінадальнага шляху, - вынікае з камюніке, апублікаванага прэс-сакратаром Канферэнцыі Біскупаў Германіі Маціясам Копам.

Згодна з паведамленнем, у апошнія дні адбыўся абмен лістамі паміж старшынёй епіскапату, біскупам Георгам Бэтцынгам і прэфектам Кангрэгацыі па справах духавенства на тэму інструкцыі, якая змяшчае тэалагічныя і кананічныя спасылкі на місію парафііі. У Рыме павінна адбыцца дыскусія на гэту тэму. Гэта пытанне ўжо было прадметам рабочых дыскусій паміж прадстаўнікамі Кангрэгацыі і нямецкімі іерархамі.

Старшыня Канферэнцыі Біскупаў Германіі лічыць мэтазгодным абмеркаванне з удзелам прэзідыума Сінадальнага шляху. Біскуп Бэтцынг па магчымасці абмяркуе гэтае пытанне з ватыканскай дыкастэрыяй

, - паведаміў Коп.

У ватыканскай інструкцыі, між іншым, гучыць заўвага адносна дзейнасці парафіяльных рад, душпастырскай і эканамічнай. Гэта асабліва актуальна ў кантэксце Касцёла ў Германіі, дзе такія структуры маюць значны ўплыў на жыццё супольнасці.

Дакумент нагадвае, што Рады маюць кансультацыйны характар і ўзначальваюцца пробашчам. Іх роля заключаецца ў распараджэнні дабротамі парафіі і спрыянні “культуры салідарнай адказнасці, адміністрацыйнай празрыстасці і дапамогі ў патрэбах Касцёла”. Гэта не бюракратычныя органы. Іх галоўная задача – пошук і вывучэнне практычных прапаноў у галіне душпастырскіх і дабрачынных ініцыятыў парафіі ў згодзе з агульным шляхам дыяцэзіі.

У адным з інтэрв’ю кардынал Стэла абверг абвінавачванні ў тым, што інструкцыя абцяжарвае святароў адміністрацыйнымі задачамі: наадварот, дакумент мае на мэце перасцерагчы ад канцэпцыі парафіі як проста “ўстановы” культу.

Там, між іншым, гаворыцца, што свецкія не могуць кіраваць парафіямі, гэтага таксама не можа рабіць група кансэкраваных асоб і свецкіх. Толькі святар можа быць пробашчам.

Ватыканскі дакумент быў па-рознаму прыняты ў Германіі. Некаторыя біскупы назвалі яго “нерэальным і адсталым”. Іншыя іерархі выказалі ўдзячнасць Святому Пасаду – інструкцыя, на іх думку, вызначае місіянерскі кірунак для Касцёла.

У адказ на жорсткую крытыку, кардынал-прэфект заявіў, што будзе рады сустрэцца з прадстаўнікамі нямецкага епіскапату, каб развеяць іх сумневы і абурэнне.
 

27 кастрычніка 2020, 13:34