Пошук

Vatican News
Кардынал Пьетра Паралін у Лурдзе Кардынал Пьетра Паралін у Лурдзе  (AFP or licensors)

Бліжэйшы супрацоўнік Папы з пілігрымкай у Лурдзе

Кардынал Дзяржсакратар Пьетра Паралін прыняў удзел у французскай нацыянальнай пілігрымцы ў Лурд. Ва ўрачыстасць Унебаўзяцця ён узначаліў марыйную працэсію і цэлебраваў св. Імшу ў санктуарыі.

У гаміліі бліжэйшы супрацоўнік Папы нагадаў, што католікі называюць Марыю “Маці суцяшэння”. Гэты тытул варта асабліва падкрэсліць у кантэксце цяперашняй пандэміі каронавіруса. “Нам вельмі патрэбна суцяшэнне. Мы звяртаемся да Маці Божай з вялікім даверам і ўпэўненасцю, што яна нас пачуе”, - сказаў іерарх.

Ён адзначыў, што Марыя вучыць нас не баяцца. “Выхаваныя ў яе школе, мы ведаем, як не адступіць і без зброі і гвалту супрацьстаяць пыхлівым і багатым, карумпаваным і маніпулятарам, якія хочуць выкарыстаць час пандэміі для ўласнай выгады”, - заўважыў кардынал Паралін.

Кіраўнік ватыканскай дыпламатыі таксама звярнуў увагу на тое, што адкрыты грот Лурда нагадвае пустую магілу Езуса. “Гэта кажа нам, што Езус перамог смерць, дае нам смеласць быць сабою, дапамагаць адзін аднаму, развіваць братэрскія пачуцці і ісці ў караване салідарнасці з усімі, хто пацярпеў падчас пандэміі”, - заявіў Дзяржаўны сакратар Яго Святасці.
 

16 жніўня 2020, 11:44