Cerca

Vatican News
Ілюстрацыйнае фота Ілюстрацыйнае фота 

Біскуп Яшэўскі пра адраджэнне культу Маці Божай Бялыніцкай

Сёння ўсе дарогі вядуць у… Бялынічы! Тут пачынаецца ўрачыстасць, прысвечаная Маці Божай Бялыніцкай. Ужо гэтым вечарам – упершыню Саракагадзіннае набажэнства, заўтра – пілігрымка, а ў нядзелю – фэст.

Гісторыя старажытнага горада на ўсходзе Беларусі непарыўна звязана з гісторыяй святыні, якая бачыла ўсё: і росквіт, і знішчэнне. А зараз – культ пашаны Маці Божай Бялыніцкай перажывае адраджэнне, адзначыў біскуп Аляксандр Яшэўскі, біскупскі вікарый для Магілёўскай вобласці. “На жаль, сёння ў Бялынічах, якія нашы продкі называлі “беларускай Чэнстаховай”, няма ні базылікі, ні кляштара кармелітаў, ні цудадзейнага абраза. Але духавенства і вернікі ніколі не забываліся аб тым, што ў спадчыне рэгіёна ёсць такая прыгожая славутая святыня і такая магутная заступніца”, - падкрэсліў іерарх.

Ікона з’явілася ў XIII стагоддзі, хутка яе назвалі Каралевай Беларусі. У 1761 г. яна стала другой пасля Жыровіцкай, увянчанай папскімі каронамі. Пажар і нашэсці, часы рэвалюцыі, пераследу і войнаў… Зараз арыгінал святыні лічыцца страчаным. Але не страчана вера ў дапамогу Бялыніцкай Маці Божай, падкрэсліў біскуп. “Апошнія звесткі навукоўцаў і мастакоў кажуць, што абраз Маці Божай Бялыніцкай, знойдзены ў вёсцы Новая Мыш Баранавіцкага раёна можа быць ці арыгіналам, ці самай ранняй копіяй, таму што цуды праз заступніцтва Бялыніцкай Маці Божай адбываюцца і сёння”, - заўважыў ён.

У гэтым годзе ўшанаваць Багародзіцу ў Бялынічы ўжо ідуць 150 пілігрымаў, а на ўрачыстасць збяруцца значна больш людзей. З цягам часу тут мараць аднавіць сапраўдны санктуарый, падзяліўся думкамі біскуп Аляксандр Яшэўскі. “Праект ужо ёсць, на мой погляд, ён вельмі прыгожы. І мы ўжо звярнуліся да ўладаў з просьбай выдзеліць зямлю. Санктуарый у гонар Маці Божай Бялыніцкай мы плануем у нашым усходнім стылі – драўляным. Таксама потым мы жадаем прасіць прыхільнасці і Біскупа Пінскага, і вернікаў парафіі Новая Мыш зрабіць для нашай Магілёўшчыны брацкі жэст, каб святыня XVII ст. заняла сваё годнае месца ў санктуарыі, які будзе створаны спецыяльна для абраза”, - падзяліўся іерарх.

Не так даўно ў Бялынічах асвяцілі новую копію абраза, які быў напісаны ў Кракаве. Сёлета Канферэнцыя Біскупаў Беларусі зацвердзіла фармуляр св. Імшы ў гонар Маці Божай Бялыніцкай. А пакуль, як і стагоддзі таму, да заступніцы накіроўваюцца вернікі: ўшаноўваць і прасіць дапамогі. І яна, з Бялыніцкай іконы, пакорліва і асцярожна глядзіць на людзей быццам у самую душу.

Навіна ў фармаце аўдыё
06 верасня 2019, 11:58