ር. ሊ. ጳ. ፍራንችስኮስ፥ ምዕመናን ስለ ሰላም እና ስለ ሲኖዶስ ጉባኤ ጸሎት እንዲያደርጉ ጠየቁ

የዚህ ዝግጅት አቅራቢ ዮሐንስ መኰንን - ቫቲካን

ርዕሠ ሊቃነ ጳጳሳት ፍራንችስኮስ፥ በቅዱስ ጴጥሮስ አደባባይ ለጸሎት ከተሰበሰቡት ምዕመናን ጋር የመልዓከ እግዚአብሔር ጸሎት ካቀረቡ በኋላ ባስተላለፉት መልዕክት፥ እንደ ጎርጎሮሳውያኑ አቆጣጠር የጥቅምት ወር ወደ እመቤታችን ቅድስት ድንግል ማርያም ዘንድ የመቁጠሪያ ጸሎት የሚቀርብበት ወር መሆኑን በማስታወስ፥ “በጦርነት ስቃይ ውስጥ በሚገኙ፥ በዩክሬን እና ሌሎች አገራት ሰላም እንዲሰፍን እንዲሁም ለተልዕኮ እንጸልይ" ብለዋል።

ቅዱስነታቸው በዚህ መልዕክታቸው፥ ምዕመናን በሙሉ የመቁጠሪያ ጸሎት የሚያስገኘውን ፍሬ በመረዳት፥ከእመቤታች ቅድስት ድንግል ማርያም ጋር በመሆን፥ በኢየሱስ ክርስቶስ ምስጢራት ላይ ማሰላሰል እና የቤተ ክርስቲያን እና የዓለም ወቅታዊ ጥያቄዎች እንዲመለሱ በመለመን የመቁጠሪያ ጸሎት ውበትን እንዲለማመዱ አሳስበዋል።

መላው ምዕመናን ለሰላም እና ለሕዝቦች የወንጌል አገልግሎት ስኬታማነት ጸሎት እንዲያደረጉ የጠየቁት ርዕሠ ሊቃነ ጳጳሳት ፍራንችስኮስ፥ በቫቲካን ከመስከረም 23 እስከ ጥቅምት 18/ 2016 ዓ. ም. ድረስ የሚካሄደውን የሲኖዶስ ጉባኤን አስታውሰው፥ በቤተ ክርስቲያን ሲኖዶሳዊነት ላይ የሚካሄደውን የሲኖዶስ ጉባኤ በጸሎት እንድንደግፈው አደራ አብለዋል።