ር. ሊ. ጳ ፍራንችስኮስ የእስራኤል እና የፍልስጤም ባለሥልጣናት የሰላም ውይይት እንዲያካሂዱ ጠየቁ

የዚህ ዝግጅት አቅራቢ ዮሐንስ መኰንን - ቫቲካን

ር. ሊ. ጳ ፍራንችስኮስ እሑድ ኅዳር 18/2015 ዓ. ም. በቅዱስ ጴጥሮስ አደባባይ ከተሰበሰቡት ምዕመናን ጋር በኅብረት ካቀረቡት የመልአከ እግዚአብሔር ጸሎት በመቀጠል ባደረገጉት ንግግር፣ በሁለቱ አገራት ማለትም በእስራኤል እና በፍልስጤም መካከል ባለፉት ወራት የተቀሰቀሰው ጦርነት ያሳሰባቸው መሆኑን ገልጸዋል።

ባለፈው ረቡዕ በኢየሩሳሌም በተፈፀመው አሰቃቂ ጥቃት አንድ እስራኤላዊ ወጣት ለሞት ዳርጎት በርካቶችንም ያቆሰላቸው መሆኑን ያስታወሱት ቅዱስነታቸው፣ በተመሳሳይ ቀን በናቡስ በታጠቁት ሰዎች መካከል በተነሳው ግጭት የአንድ ፍልስጤማዊ ወጣት ሕይወት ማለፉን አስታውሰዋል።

ሁከት የወደፊት ሕይወትን እንደሚጎዳ የተናገሩት ርዕሠ ሊቃነ ጳጳሳት ፍራንችስኮስ፣ የወጣቶችን ሕይወት እንደሚሰብርና የሰላም ተስፋ እንደሚያዳክም ጠቁመው፣ ለሞቱት ወጣቶች እና ለቤተሰቦቻቸው በተለይም ለእናቶቻቸው እንዲጸለይላቸው ጠይቀዋል።  

የእስራኤል እና የፍልስጤም ባለስልጣናት ለውይይት እና ለመተማመን ይበልጥ ትኩረትን በመስጠት በቅድስት ሀገር ውስጥ ሰላምን ለማስፈን እንደሚችሉ ተስፋ ያላቸው መሆኑን ር. ሊ. ጳ ፍራንችስኮስ ገልጸዋል።