ር.ሊ.ጳ ፍራንቸስኮስ የመንከባከብ ባህልን ለማስተዋወቅ ቤተክርስቲያን ተጠርታለች ማለታቸው ተገለጸ!

የጎርጎሮሳዊያኑን የቀን አቆጣጠር በሚከተሉ የካቶሊክ ቤተክርስቲያን ምዕመናን ዘንድ በሰኔ 29/2022 ዓ.ም የቅዱሳን ጴጥሮስ እና ጳውሎስ አመታዊ በዓል ተክብሮ ማለፉ የሚታወቅ ሲሆን ይህ በዓል ርዕሰ ሊቃነ ጳጳሳት ፍራንቸስኮስ እና ካርዲና ጆቫኒ ባቲስታ በጋራ በቫቲካን በሚገኘው የቅዱስ ጴጥሮስ ባዚሊካ ውስጥ ባሳረጉት መስዋዕተ ቅዳሴ ተክብሮ ማለፉ ተገልጿል። በወቅቱ ርዕሰ ጳጳሳት ፍራንቸስኮስ ባሳረጉት መስዋዕተ ቅዳሴ ላይ ባሰሙት ስብከት ምእመናን “በፍጥነት እንድትነሱ” እና “መልካሙን ገድል እንድትዋጉ” ተጠርታችኋል ብለዋል።

የዚህ ዝግጅት አቅራቢ መብራቱ ኃ/ጊዮርጊስ ቫቲካን

ቅዱስ አባታችን በቅዳሴው ላይ ባደረጉት ስብከት በእለቱ ከተነበቡት ምንባባት ውስጥ ሁለት አባባሎች ላይ ትኩረት አድርገው ነበር፡- “ቶሎ ተነስ” በማለት መልአኩ ለቅዱስ ጴጥሮስ በእስር ቤት ውስጥ የሰጠው ትእዛዝ የመጀመርያው ሲሆን በመቀጠልም "መልካሙን ገድል ተጋደሉ" የሚለው ቅዱስ ጳውሎስ ለክርስቲያኖች ያቀረበው ጥሪ ላይ መሰረቱን ያደረገ እንደ ነበረ ተገልጿል።

“የዛሬው የክርስቲያን ማህበረሰብ በሲኖዶስ ሂደት ውስጥ የተሰማራው” የነዚህን ሁለት ሀረጎች ትርጉም ማሰላሰል ይኖርበታል ያሉት ቅዱስነታቸው የመጀመርያው ቃል ‘ቶሎ ተነስ’ የሚለው እንደ ነበረ አመልክተዋል።

'ቶሎ ተነስ'

ሊቀ ጳጳሱ ቅዱስ ጴጥሮስ በሄሮድስ ታስሮ እንደነበር እና መልአኩ ተገልጦለት ከእንቅልፉ ቀስቅሶ “ቶሎ እንዲነሣ” እንዳዘዘው  አስታውሰዋል።

“ትዕይንቱ የትንሳኤ ታሪክን ያስታውሰናል ምክንያቱም በትንሳኤ ታሪክ ውስጥ የሚገኙትን ‘ተነስ’ እና ‘ንቃ’ የተሰኙትን ሁለት ግሦች ስላቀፈ ነው፡ ለጴጥሮስ ይህ ከሄሮድስ እስር ቤት የማምለጡ የመጀመሪያ ምልክት ነበር፣ ለቤተክርስቲያን ግን ወደ ትንሳኤው ምስጢር እንድትገባ የቀረበ ጥሪ እና ጌታ ለእኛ ሊጠቁመን በሚፈልጋቸው መንገዶች እንዲመራን ፍቀድ መቀበል ማለት ነው ብለዋል።

ይሁን እንጂ ብዙውን ጊዜ “ለመነሳት የሚከለክሉን የተቃውሞ ዓይነቶች” ስንፍናን ወይም ለውጥን መፍራትን ጨምሮ ወደ መካከለኛ መንፈሳዊነት እንድናመራ ያደርገናል፣ አሁን በሂደት ላይ ባለው ሲኖዶስ ውስጥ እንድንፈጽም የተጠራንበት መንገድ ነው፣ “የምትነሳ፣ ራሷን በራሷ የቆለፈች ቤተክርስቲያን ሳትሆን፣ ነገር ግን ወደፊት መግፋት የምትችል፣ ታስራ የምትገኝበትን ሥፍራ ትታ አለምን ለመገናኘት የምትነሳ ቤተክርስትያን እንድንሆን ክርስቶስ ይፈልጋል ብለዋል።

‘መልካሙን ተጋድሎ’

ሁለተኛው ሐረግ የመጣው ቅዱስ ሐዋርያው ጳውሎስ ለጢሞቴዎስ ከላከው መልእክት ነው፣ እሱም መላ ሕይወቱን መለስ ብሎ ሲመለከት “መልካሙን ገድል ተጋድያለሁ” ብሏል። ቅዱስ ጳውሎስ በታሪክ ውስጥ “ብዙ ሰዎች ኢየሱስን ለመቀበል ፍላጎት ስለሌላቸው ፍላጎታቸውን ማሳደድና ሌሎች አስተማሪዎች መከተልን ይመርጣሉ” በማለት በታሪክ ውስጥ የተካሄደውን ውጊያ ተመልክቷል። ቅዱስ ጳውሎስ የራሱን ጦርነቶች በመዋጋቱ ጢሞቴዎስን እና በአካባቢው ያሉ ክርስቲያኖች ሥራቸውን “በትጋት፣ በስብከትና በማስተማር” እንዲቀጥሉ ጠይቋል።

ርዕሠ ሊቃነ ጳጳሳት ፍራንችስኮስ የጳውሎስ ማሳሰቢያ “ለእኛም የሕይወት ቃል ነው” በማለት ሁላችንም የተጠራነው ሚስዮናውያን ደቀ መዛሙርት እንድንሆን የሚረዳን መሆኑን እንድንገነዘብ ይረዳናል፣ እያንዳንዱም ሰው የበኩሉን አስተዋጾ ሊያደርግ ይገባዋል ብለዋል።

ርዕሰ ሊቃነ ጳጳሳቱ ለዘመናችን ክርስቲያኖች ሁለት ጥያቄዎችን አቅርበዋል። በመጀመሪያ “ለቤተክርስቲያን ምን ማድረግ እችላለሁ?” ብለን መጠየቅ አለብን ብለዋል። ስለ ቤተክርስቲያኑ ቅሬታ ማቅረብ ብቻ ጥቅም እንደ ሌለው በመጥቀስ ያስጠነቀቁ ሲሆን እናም ምእመናን በቤተክርስቲያኗ ስራ በስሜት እና በትህትና እንዲሳተፉ ጋብዟል። “ሲኖዶሳዊ ቤተ ክርስቲያን ማለት ይህ ነው፡ እያንዳንዱ ሰው የራሱ ድርሻ አለው፣ በሌሎች ምትክ ወይም በሌሎች ላይ ያለ ግለሰብ የለም” ብሏል።

ከዚያም “እንደ ቤተክርስቲያን የምንኖርበትን ዓለም የበለጠ ሰብአዊ፣ ፍትሃዊ እና አንድነት ያለው፣ ለእግዚአብሔር ክፍት እና በሰዎች መካከል ወንድማማችነት እንዲኖረን ምን እናድርግ?” ይህ ማለት ፍሬ በሌለው ክርክር ውስጥ ወድቆ ወደ “የቤተ ክርስቲያን ክበቦች” ማፈግፈግ ሳይሆን ይልቁንም “በዓለም ውስጥ ያለው ሊጥ እንዲቦካ እርስ በርስ መረዳዳት” ማለት ነው ብለዋል።

"በአንድ ቃል፣ ለችግር ተጋላጭ ለሆኑ ሰዎች የመተሳሰብ እና የመንከባከብ ባህልን የምናበረታታ ቤተክርስቲያን እንድንሆን ተጠርተናል" ያሉት ቅዱስነታቸው ቤተክርስቲያን፣ ሁሉንም ዓይነት ሙስና እና መበስበስን እንድትዋጋ ተጠርታለች… በሁሉም ሰዎች ህይወት ውስጥ የወንጌል ደስታ እንዲበራ የማድረግ ይህ ተግባር የእኛ “መልካም ገድል” ነው ብሏል።