ፈልግ

Vatican News
ርዕሰ ሊቃነ ጳጳሳት ፍራንቸስኮስ በቫቲካ የጠቅላላ የትምህርተ ክርስቶስ አስተምህሮ ባደረጉበት ወቅት ርዕሰ ሊቃነ ጳጳሳት ፍራንቸስኮስ በቫቲካ የጠቅላላ የትምህርተ ክርስቶስ አስተምህሮ ባደረጉበት ወቅት   (Vatican Media)

ር.ሊ.ጳ ፍራንቸስኮስ በቃል የሚደረግ ጸሎት ከእግዚአብሄር ጋር ለመነጋገር አስተማማኝ መንገድ ነው አሉ

ርዕሰ ሊቃነ ጳጳሳት ፍራንቸስኮስ ዘወትር ረቡዕ እለት ከቫቲካን ሆነው የጠቅላላ የትምህርተ ክርስቶስ አስተምህሮ እንደ ሚያደርጉ የሚታወቅ ሲሆን በእዚህ መሰረት ቅዱስነታቸው በሚያዝያ 13/2013 ዓ.ም ያደረጉት የጠቅላላ የትምህርተ ክርስቶስ አስተምህሮ በጸሎት ዙሪያ ላይ ያተኮረ አስተምህሮ እንደ ነበረ የተገለጸ ሲሆን ድምጽ/ቃላት በማውጣት የሚደረግ ጸሎት ከእግዚአብሄር ጋር ለመነጋገር አስተማማኝ መንገድ ነው ማለታቸው ተገልጿል።

የእዚህ ዝግጅት አቅራቢ መብራቱ ኃ/ጊዮርጊስ ቫቲካን

ክቡራን እና ክቡራት የዝግጅቶቻችን ተከታታዮች ርዕሰ ሊቃነ ጳጳሳት ፍራንቸስኮስ በወቅቱ ያደረጉትን የጠቅላላ የትምህርተ ክርስቶስ አስተምህሮ ሙሉ ይዘቱን እንደ ሚከተለው አሰናድተነዋል፣ ተከታተሉን።

የተወደዳችሁ ወንድሞቼ እና እህቶቼ እንደምን አረፈዳችሁ!

ጸሎት ከእግዚአብሄር ጋር የሚደረግ ውይይት ነው፤ እናም እያንዳንዱ ፍጡር በተወሰነ መልኩ ከእግዚአብሄር ጋር “ውይይት” ያደርጋል። በሰው ልጅ ውስጥ ጸሎት ቃል ፣ ልመና ፣ መዝሙር ፣ ግጥም ይሆናል… መለኮታዊው ቃል ሥጋ ሆኗል ፣ እናም በእያንዳንዱ ሰው ሥጋ ውስጥ ቃሉ በጸሎት መልክ ወደ እግዚአብሔር ይመለሳል።

ቃላት የእኛ ፍጥረታት ናቸው ፣ ነገር ግን እነሱ ደግሞ እናቶቻችን ናቸው ፣ እናም በተወሰነ ደረጃ እኛን ይቀርጹናል። የጸሎት ቃላት በጨለማ ሸለቆ ውስጥ በደህና እንድናልፍ ያደርገናል፣ ውሃ ወዳለባቸው አረንጓዴ ሜዳዎች ይመራናል ፣ እናም ዘማሪው እንደሚያስተምረን በጠላቶቻችን ፊት እንድንመገብ ያደርገናል (መዝ 23)። ቃላት ከስሜት ይወለዳሉ ፣ ነገር ግን የተገላቢጦሽ መንገድም አለ-ቃላቶች ስሜትን የሚቀርጹበት ሂደት አለ። ሁሉም ነገር በቃሉ በኩል ወደ ብርሃን እንዲመጣ ፣ የሰው ልጅ የማይገለል እንደሆነ መጽሐፍ ቅዱስ ሰዎችን ያስተምራል። ከሁሉም በላይ ህመም ተሸፋፍኖ በውስጣችን ተዘግቶ ከቆየ አደገኛ ነው ...

ለዚህም ነው መጽሐፍ ቅዱስ አንዳንድ ጊዜ በድፍረት ቃላት እንኳን እንድንጸልይ የሚያስተምረን። ቅዱሳን ጸሐፊዎች ስለሰው ልጅ እኛን ለማሳት አይፈልጉም - በልባችን ውስጥ የማይዋሃዱ ስሜቶች ፣ ጥላቻም ጭምር እንዳለ ያውቃሉ። ማናችንም ቅዱስ ሆነን አልተወለድንም እናም እነዚህ መጥፎ ስሜቶች የልባችንን በር ሲያንኳኩ ሲመጡ በጸሎት እና በእግዚአብሔር ቃላቶች ማብረድ መቻል አለብን ። በመጽሐፈ መዝሙር ውስጥ እንዲሁ በጠላቶች ላይ በጣም ከባድ መግለጫዎችን እናገኛለን - መንፈሳዊ አስተማሪዎች ዲያቢሎስን እና ኃጢአታችንን በተመለከተ በሚያስተምሩን የትምህርት መገለጫዎች - ነገር ግን እነሱ የሰዎች እውነታ የሆኑ እና ወደ ቅድስና የሚወስዱን ቃላቶች ናቸው። በአመፅ ጊዜ መጥፎ ስሜቶችን ምንም ጉዳት የሌለባቸው ለማድረግ የሚረዱ ቃላት ባይኖሩ ኖሮ ምንም ጉዳት እንዳያደርሱባቸው ለማሰራጨት ቃሉ ባይኖር ኖሮ ዓለም ሊደናቀፍ እንደሚችል እዛው ይመሰክራሉ።

የመጀመሪያው የሰው ልጅ ጸሎት ሁል ጊዜ በድምፅ የሚደረግ ነው። ከንፈሮች ሁል ጊዜ መጀመሪያ ይንቀሳቀሳሉ።ምንም እንኳን መጸለይ ቃላትን መደጋገም ማለት እንዳልሆነ ሁላችንም የምናውቅ ቢሆንም ፣ የድምጽ ጸሎት ግን በጣም አስተማማኝ ነው ፣ እናም ሁል ጊዜም ተግባራዊ ሊሆን ይችላል። ስሜቶች ፣ በሌላ በኩል ፣ ምንም እንኳን የከበሩ ቢሆኑም ሁል ጊዜ እርግጠኛ አይደሉም -ይመጣሉ እና ይሄዳሉ ፣ እኛን ትተው ይመለሳሉ። ያ ብቻ አይደለም ፣ ነገር ግን የጸሎት ጸጋዎች እንዲሁ የማይገመቱ ናቸው - አንዳንድ ጊዜ ማጽናኛዎች ብዙ ናቸው ፣ ነገር ግን በጨለማው ቀናት ውስጥ ሙሉ በሙሉ የሚተኑ ይመስላሉ። የልብ ጸሎት ሚስጥራዊ ነው ፣ እና አንዳንድ ጊዜ ይጎድላል። በከንፈር የሚጸልይ ፣ በሹክሹክታ ወይም በዜማ የሚነበብ ፣ በምትኩ ሁል ጊዜ ይገኛል።የካቶሊክ ቤተክርስቲያን ትምህርተ ክርስቶስ ይህንን በተመለከተ እንዲህ ይላል - “በቃል/በድምጽ የሚከናወን ጸሎት የክርስቲያናዊ ሕይወት ሁነኛ ክፍል ነው። በመምህራቸው የተመስጦ ጸሎት ተደንቀው የነበሩ ደቀ መዛሙርት ኢየሱስ “አባታችን ሆይ” የተሰኘውን የቃል ጸሎት ያስተምራቸዋል (የካቶሊክ ቤተክርስቲያን ትምህርተ ክርስቶስ ቁ.2701)።

ሁላችንም የተወሰኑ አረጋውያን ያላቸውን ዓይነት ትህትና ሊኖረን ይገባል ፣ ምናልባት በቤተክርስቲያንም ውስጥ ሆነው የመስማት ችሎታቸው በመቀነሱ የተነሳ በልጅነታቸው የተማሩትን ጸሎቶች በእርጋታ የሚያነበንቡ፣ መንገዱን በሹክሹክታ የሚሞሉ አረጋዊያን ያላቸውን ባህርይ ልንመለከት ይገባል። ያ ጸሎት ዝምታውን አይረብሽም ፣ ነገር ግን ለጸሎት ግዴታ ታማኝነታቸውን ይመሰክራል ፣ በሕይወታቸው በሙሉ በተግባር ይለማመዳሉ። እነዚህ የትህትና ጸሎት ፈላጊዎች ብዙውን ጊዜ የምእመናኖቹ ታላላቅ አማላጆች ናቸው እነሱ ከዓመት እስከ ዓመት ቅርንጫፎቻቸውን የሚያሰራጩት ቁጥቋጦዎች እጅግ ብዙ ለሆኑ ሰዎች ጥላን የሚሰጡ ናቸው። እነዚያን ሰዎች ከሚያነቧቸው ጸሎቶች ጋር መቼ እና ምን ያህል እንደተዋሃዱ እግዚአብሔር ብቻ ያውቃል - በእርግጥ እነዚህ ሰዎች ጨላም የሆኑ ጊዜያትን እና ባዶ ጊዜዎችን ጭምር መጋፈጥ ነበረባቸው። ነገር ግን አንድ ሰው በድምጽ ለሚደረግ ጸሎት ሁል ጊዜ ታማኝ ሆኖ መቆየት ይችላል።

ሁላችንም በመንፈሳዊነት በሚታወቅ ሥራ ላይ ከተጠቀሰው የሩሲያው መንፈሳዊ ነጋዲ ጽናት አንድ ዓይነት ልመናን ደጋግሞ በመድገም የጸሎትን ጥበብ ከተማረበት ጽናት መማር እንችላለን-“የእግዚአብሔር ልጅ ጌታ ኢየሱስ ክርስቶስ ሆይ ፣ እኛን ኃጢአተኞች ማረን! እንደ ልጅ ፣ ቀለል ያለ ክርስቲያናዊ መግለጫን ለማንበብ አጥብቀን ስለያዝን ይሆናል ፣ በመጨረሻም የስትንፋሻችን አካል ይሆናል።

ስለሆነም በቃላት የሚደረጉ ፀሎቶችን ችላ ማለት የለብንም። የምንናገራቸው ቃላት በእጃችን ይይዙናል፣ አንዳንድ ጊዜ ጣዕምን ያድሳሉ ፣ የተኙትን ልቦች እንኳን ያነቃሉ ፣ ትዝታዎቻችንን የጠፋብንን ስሜቶች እንደገና ተመልሰው እንዲመጡ ያደርጋሉ። እናም በእርግጠኝነት ከሁሉም በላይ እነሱ ሊሰማቸው የሚፈልጓቸውን ጥያቄዎች ወደ እግዚአብሔር የሚያቀናጁት እነሱ ብቻ ናቸው። ኢየሱስ በጭጋግ ውስጥ አልተወንም። እርሱ “እንግዲያውስ እንደዚህ ጸልዩ” ብሎ አስተምሮናል። እንዲሁም የጌታን ጸሎት አስተምሮናል (ማቴዎስ 6፡9)።

21 April 2021, 10:46