ር.ሊ.ጳ ፍራንቸስኮስ ቤተክርስቲያን የጸሎት ቤት እና የጸሎት አስተማሪ ናት አሉ!

ርዕሰ ሊቃነ ጳጳሳት ፍራንቸስኮስ ዘወትር ረቡዕ እለት የጠቅላላ የትምህርተ ክርስቶስ አስተምህሮ እንደ ሚያደርጉ የሚታወቅ ሲሆን በእዚህ መሰረት ቅዱስነታቸው በሚያዚያ 06/2013 ዓ.ም ያደረጉት የትምህርተ ክርስቶስ አስተምህሮ በጸሎት ዙሪያ ላይ ያተኮረ እንደ ነበረ የተገለጸ ሲሆኑ ቤተክርስቲያን የጸሎት ቤት እና የጸሎት አስተማሪ ናት ማለታቸው ተገልጿል።

የዚህ ዝግጅት አቅራቢ መብራቱ ኃ/ጊዮርጊስ ቫቲካን

ክቡራን እና ክቡራት የዝግጅቶቻችን ተከታታዮች ርዕሰ ሊቃነ ጳጳሳት ፍራንቸስኮስ በወቅቱ ያደረጉትን የጠቅላላ የትምህርተ ክርስቶስ አስተምህሮ ሙሉ ይዘቱን እንደ ሚከተለው አሰናድተነዋል፣ ተከታተሉን።

የተወደዳችሁ ወንድሞቼ እና እህቶቼ እንደምን አረፈዳችሁ!

ቤተክርስቲያን ታላቅ የጸሎት ትምህርት ቤት ናት። ብዙዎቻችን የመጀመሪያ ጸሎታችንን በወላጆቻችን ወይም በአያቶቻችን እቅፍ ላይ ሆነን እንዴት መጸለይ እንደሚቻል ተምረናል። ከመተኛታችን በፊት ጸሎታችንን እንድንጸል ያስተማሩን እናቶቻችን እና አባቶቻችን መታሰቢያቸውን ከፍ አድርገን ልንመለከት እንችላለን። እነዚህ የማስታወስ ጊዜያት ወላጆች ብዙውን ጊዜ የቅርብ ምስጢር የሚያዳምጡባቸው እና በወንጌል መንፈስ መሪነት ምክሮቻቸውን የሚሰጡበት ጊዜ ነው። ከዚያ በኋላ ደግሞ ሌሎች ምስክሮች እና የጸሎት አስተማሪዎች ያሉባቸው ሌሎች ገጠመኞች አሉ (የካቶሊክ ቤተክርስቲያን ትምህርተ ክርስቶስ ቁ. 2686-2687 ን ይመልከቱ)። ይህ ለማስታወስ መልካም አጋጣሚ ነው።

የአንድ ደብር እና እያንዳንዱ የክርስቲያን ማህበረሰብ ሕይወት በስርዓተ አምልኮ ጊዜያት እና በማህበረሰብ ጸሎት ጊዜያት ተለይቷል። በጨቅላነታችን በቀላሉ የተቀበልነው ስጦታ ትልቅ ቅርስ እና የሀብት ምንጭ መሆኑን እና የፀሎት ልምዱ የበለጠ እና ጥልቅ እየሆነ እንደሚገባ እንገነዘባለን (የካቶሊክ ቤተክርስቲያን ትምህርተ ክርስቶስ ቁ. 2688 ይመልከቱ)። የእምነት ልብስ አይቀደድም፣ ነገር ግን በችግር እና በትንሳኤ ጊዜያትም ቢሆን ከእኛ ጋር ያድጋል። የእምነት እስትንፋስም ጸሎት ነው - መጸለይ ስንማር በእምነት እናድጋለን። ከተወሰኑ የሕይወት ልምዶች በኋላ ያለ እምነት ከአንድ ሕይወት ወደ ሌላ መሻገር እንደምንችል እና ጥንካሬያችን ፀሎት እንደሆነ እንገነዘባለን። በግል መጸለይ ብቻ ሳይሆን ፣ የወንድሞቻችንና የእህቶቻችን ፣ እንዲሁም አብሮን የተጎናጸፈና የደገፈን ማህበረሰብም ጭምር ነው።

በዚህ ምክንያት ለጸሎት የተሰጡ ማህበረሰቦች እና ቡድኖች በቤተክርስቲያኗ ውስጥ ይለመልማሉ። አንዳንድ ክርስቲያኖች ፀሎታቸውን በዘመናቸው ዋና ተግባራትን ከማከናወናቸው በፊት መጸልይ እንደ ሚገባቸው የሚያሳስብ ጥሪ ሊገጥማቸው ይችል ይሆናል። ለእግዚአብሄር የተቀደሱ ሰዎች በሚኖሩበት ቤተክርስቲያን ውስጥ ገዳማት ፣ ደብሮች ውስጥ በመጸልይ የሚኖሩ ሰዎች አሉ። ብዙውን ጊዜ ኃይለኛ ጸሎት የሚካፈሉበት እና በየቀኑ የወንድማማችነት ኅብረት የሚገነቡባቸው ትናንሽ ማሕበራት የመንፈሳዊ ብርሃን ማዕከሎች ይሆናሉ። እነሱ ለቤተክርስቲያን አባላት ብቻ ሳይሆን በአጠቃላይ ለኅብረተሰቡ ራሱ አስፈላጊ ህዋሳት ናቸው። ገዳማዊያን በአውሮፓ ሥልጣኔ መወለድና ማደግ እንዲሁም በሌሎች ባህሎች ውስጥም የተጫወቱትን ሚና እናስብ። መጸለይ እና በማህበረሰብ ውስጥ መሥራት ዓለም ወደ ፊት እንዲሄድ ያደርገዋል።

በቤተክርስቲያኗ ውስጥ ያሉት ሁሉም ነገሮች የሚመነጩት በጸሎት ነው፣ እናም ሁሉም ነገር ለጸሎት ምስጋና ይግባውና ሁሉም ነገር እያደገ እንዲሄድ የሚያደርገው ጸሎት ነው። ጠላት ፣ እርኩስ የሆነ መንፈስ፣ ቤተክርስቲያንን ለመዋጋት ሲፈልግ ፣ በመጀመሪያ የሚያደርገው ነገር ቢኖር ምንጯን ማድረቅ፣ የጸሎት መንፈስን ለማስወገድ መሞከር ነው። ጸሎት ማዳረግ ካቆምን ለተወሰነ ጊዜ ሁሉም ነገር እንደ ሁልጊዜ ሊሄድ የሚችል ይመስላል። ነገር ግን ከትንሽ ጊዜ በኋላ ቤተክርስቲያን እንደ ባዶ ቀፎ እንደ ሆነች ፣ ተሸካሚዋ ምሶሶዋን ያጣች እንደ ሆነች፣ ከእንግዲህ የሙቀት እና የፍቅር ምንጭ እንደሌላት ትገነዘባለች።

ቅዱሳን ሴቶች እና ወንዶች ከሌሎች ሰዎች የተሻለ ቀላል ሕይወት የላቸውም። እነሱ እንኳን በእውነቱ የሚጋፈጧቸው የራሳቸው ችግሮች አሏቸው ፣ እናም በተጨማሪ ፣ እነሱ ብዙውን ጊዜ አላማቸውን የሚቃወም ተግዳሮት ይገጥማቸዋል። ነገር ግን የእነሱ ጥንካሬ ጸሎት ነው። ሁልጊዜ ከእናት ቤተክርስቲያን ከማይጠፋው “የውሃ ጉድጓድ” ምንጭ ይጠጣሉ። ለመብራት እንደሚያገለግል ዘይት በጸሎት የእምነታቸውን ነበልባል ይመገባሉ። እናም በእምነት እና በተስፋ በመራመድ ወደፊት ይጓዛሉ። በዓለም ፊት ብዙ ጊዜ እንደ ከንቱ የሚቆጠሩት ቅዱሳን በእውነቱ የሚደገፉት በገንዘብ እና በኃይል መሳሪያዎች ሳይሆን በጸሎት መሳሪያ ነው።

በሉቃስ ወንጌል ውስጥ ኢየሱስ “የሰው ልጅ በሚመጣበት ወቅት በምድር ላይ እምነትን ያገኝ ይሆን?” እንዳለው ሁሉ እኛም እንዲሁ እንድንል የሚያስችለን አስገራሚ ጥያቄ አቅርቧል (ሉቃስ 18፡8)። ይህ ጥያቄ የሚደክመው ሳይደክም በፅናት መጸለይ አስፈላጊ መሆኑን በሚያሳይ ምሳሌ መጨረሻ ላይ ነው (18፡1-8 ይመልከቱ)። ስለሆነም ፣ የጸሎት ዘይት እስካለ ድረስ የእምነት መብራት በምድር ላይ ሁልጊዜ እንደሚበራ መደምደም እንችላለን።

ይህ የቤተክርስቲያኗ አስፈላጊ ተግባር ነው - መጸለይ እና እንዴት መጸለይ እንደሚቻል ማስተማር። ከትውልድ ወደ ትውልድ የእምነት መብራትን እና የፀሎትን ዘይት ለማስተላለፍ ጸሎት እጅግ አስፈላጊ ነው። ያለዚህ መብራት የወንጌልን መንገድ ማየት አንችልም ነበር፣ ለመቅረብ እና ለማገልገል የወንድሞችንና የእህቶችን ፊት ማየት አንችልም ነበር። በማኅበረሰብ ውስጥ የምንገናኝበትን ክፍል ማብራት አንችልም ነበር። ያለ እምነት ሁሉም ነገር ይፈርሳል፣ ያለ ጸሎት እምነት ይጠፋል። በዚህ ምክንያት ፣ ቤተክርስቲያን እንደ ህብረት ቤት እና ትምህርት ቤት ፣ የጸሎት ቤት እና ትምህርት ቤት ናት።