ፈልግ

Vatican News
ር.ሊ.ጳ ፍራንቸስኮስ በቫቲካን ር የጠቅላላ የትምህርተ ክርስቶስ አስተምህሮ ባደረጉበት ወቅት ር.ሊ.ጳ ፍራንቸስኮስ በቫቲካን ር የጠቅላላ የትምህርተ ክርስቶስ አስተምህሮ ባደረጉበት ወቅት   (Vatican Media)

ር.ሊ.ጳ ፍራንቸስኮስ ክርስቲያኖች የእግዚአብሔርን መኖር በሕይወታቸው እንዲመሰክሩ ተጠርተዋል አሉ!

ርዕሰ ሊቃነ ጳጳሳት ፍራንቸስኮስ ዘወትር ረቡዕ እለት የጠቅላላ የትምህርተ ክርስቶስ አስተምህሮ እንደ ሚያደርጉ የሚታወቅ ሲሆን በእዚህም መሰረት ቅዱስነታቸው በመጋቢት 08/2013 ዓ.ም በጸሎት ዙሪያ ላይ ባደረጉት የትምህርተ ክርስቶስ አስተምህሮ ክርስቲያኖች የእግዚአብሔርን መኖር በሕይወታቸው በመኖር እንዲመሰክሩ ተጠርተዋል ማለታቸው ተገልጿል።

የእዚህ ዝግጅት አቅራቢ መብራቱ ኃ/ጊዮርጊስ ቫቲካን

ክቡራን እና ክቡራት የዝግጅቶቻችን ተከታታዮች ርዕሰ ሊቃነ ጳጳሳት ፍራንቸስኮስ በወቅቱ ያደረጉትን የጠቅላላ የትምህርተ ክርስቶስ አስተምህሮ ሙሉ ይዘቱን እንደ ሚከተለው አሰናድተነዋል፣ ተከታተሉን።

የተወደዳችሁ ወንድሞቼ እና እህቶቼ እንደምን አረፈዳችሁ!

ከእዚህ ቀደም በጸሎት ዙሪያ ላይ ጀምረነው የነበረውን የጠቅላላ የትምህርተ ክርስቶስ አስተምህሮ በመቀጠል ጸሎት ከቅድስት ሥላሴ ጋር በተለይም ከመንፈስ ቅዱስ ጋር ያለውን ዝምድና ከተመለከትን በኋላ ዛሬ እናጠናቅቃለን።

የእያንዳንዱ ክርስቲያን የመጀመሪያ የሕልውና ስጦታ መንፈስ ቅዱስ ነው።  እሱ ከብዙ ስጦታዎች አንዱ አይደለም ፣ ነገር ግን ይልቁኑ መሠረታዊ ስጦታ ነው። ያለ መንፈስ ቅዱስ ከክርስቶስ እና ከአብ ጋር ምንም ዓይነት ግንኙነት ሊኖረን አይችልም፣ ምክንያቱም መንፈስ ቅዱስ ልባችንን በመክፍት ከክርስቶስ ጋር እንድንገኛኝ በማድረግ ወደ እግዚአብሄር ፍቅር ወደዚያ ወደ “ፍቅር ማዕበል” ይሳበዋልና። እኛ በዚህች ምድር ጉዞ ውስጥ እንግዶች እና ምፅዕተኞች ብቻ አይደለንም ፣ እኛ ደግሞ በቅድስት ሥላሴ ውስጥ እንግዶች እና ምፅዕተኞች ነን። እኛ አንድ ቀን በራሱ ድንኳን ውስጥ ሶስት መንገደኞችን ተቀብሎ ባስተናገደበት ወቅት እግዚአብሔርን እንደተገናኘው እንደ አብርሃም ነን። በእውነት “አባ - አባባ” ብለን በመጥራት እግዚአብሔርን መጠየቅ መቻላችን የተከሰተው መንፈስ ቅዱስ በውስጣችን ስለሚኖር ነው፣ እርሱ በጥልቅ ይለውጠናል እናም እንደ እውነተኛ ልጆቹ በእግዚአብሔር የመወደዳችን ግሩም የሆነ ደስታን እንድናጣጥም ያደርገናል።

የካቶሊክ ቤተክርስቲያን ትምህርተ ክርስቶስ በዚህ ረገድ እንዲህ ይላል-“ወደ ኢየሱስ መጸለይ በጀመርን ቁጥር ሁሉ እርሱ በሚመኘው ፀጋው በጸሎት መንገድ ላይ የሚስበን መንፈስ ቅዱስ ነው። እርሱ ክርስቶስን በማስታወስ እንድንጸልይ ስለሚያስተምረን እኛስ ወደ መንፈስ እንዴት መጸለይ አንችልም? ለዚያም ነው ቤተክርስቲያኗ በየቀኑ መንፈስ ቅዱስን እንድንጠራ የምትጋብዘው ፣ በተለይም የእያንዳንዱ አስፈላጊ እርምጃ መጀመሪያ እና መጨረሻ ላይ መንፈስ ቅዱስን በሕይወታችን ውስጥ እንዲገባ መጋበዝ ይኖርብናል” (ቁጥር 2670)። ይህ በእኛ ውስጥ ያለው የመንፈስ ሥራ ነው። ባለፈው ጊዜ ከነበረው ባሕርይ እንዳይቀነስ ኢየሱስን “ያስታውሰናል” እናም እኛን እንዲቀርበን ያደርገናል። ክርስቶስ በጊዜ ሩቅ ቢሆን ኖሮ እኛ ብቻችንን የምንሆን እና በዓለም ውስጥ የምንጠፋ ሰዎች እንሆን ነበር። በመንፈስ ቅዱስ ግን ሁሉም ነገር ሕያው ነው - ክርስቶስን የማግኘት ዕድሉ ለእያንዳንዱ ጊዜ እና ቦታ ለክርስቲያኖች ክፍት ነው። እሱ ሩቅ አይደለም ፣ እሱ ከእኛ ጋር ነው አሁንም እንደ ጴጥሮስ ፣ ከጳውሎስ ፣ ከመግደላዊት ማርያም ጋር እንዳደረገው ልባቸውን በመለወጥ ደቀ መዛሙርቱን ያስተምራል።

ይህ የሚጸልዩ የብዙ ሰዎች ተሞክሮ ነው - በክርስቶስ “ልኬት” መሠረት መንፈስ ቅዱስ ከፈጠራቸው ወንዶችና ሴቶች ፣ በምህረት ፣ በአገልግሎት ፣ በጸሎት ... ወዘተ እንደዚህ ያሉ ሰዎችን መገናኘት መቻል ጸጋ ነው፣ የተለየ ሕይወት በእነሱ ውስጥ እንደሚወዛወዝ ይገነዘባሉ ፣ የእነሱ እይታ ከእዚያ “ባሻገር” ነው። እኛ ይህ ነገር የሚከናወነው በመነኮሳት እና በገዳማዊያን ሕይወት ውስጥ ብቻ ነው ብለን እናስብ ይሆናል። ነገር ግን እንዲህ አይደለም፣ ይህ ለምድ በማነኛውም ሰው ውስጥ ሊከሰት ይችላል፣ ከእግዚአብሔር ጋር ረጅም የውይይት ታሪክን የሠሩ ሰዎች ፣ አንዳንድ ጊዜ እምነታቸውን በሚያጸዳ ውስጣዊ ትግል በሚያከናውኑ ሰዎች ውስጥ ይገኛል። እነዚህ ትሁት ምስክሮች በችግር ውስጥ ያለ ወንድም ወይም እህት ፊት በተቀበሉት እና በሚሰግዱበት የቅዱስ ቁርባን ውስጥ በወንጌል ውስጥ እግዚአብሔርን ይፈልጉ ነበር፣ እናም እነሱ እንደ ምስጢራዊ የእሳት ነበልባል መንፈስ ቅዱስኑን ይጠባበቃሉ።

የክርስቲያኖች የመጀመሪያ ተግባር በእርግጥ ኢየሱስ ወደ ምድር ያመጣውን ይህን ነበልባል በሕይወት ማቆየት ነው (ሉቃስ 12: 49 ን ይመልከቱ) ማለትም የእግዚአብሔር ፍቅር እና መንፈስ ቅዱስን ማለት ነው። ያለመንፈስ እሳት ፣ ትንቢቶቹ ይጠፋሉ ፣ ሀዘን ደስታን ይተካል ፣ ልማድ ፍቅርን ይተካል እና አገልግሎት ወደ ባርነት ይለወጣል። ቅዱስ ቁርባን በሚቀመጥበት መንበረ ታቦት አጠገብ ያለው የበራ መብራት ምስል ወደ አእምሯችን ይመጣል። ቤተክርስቲያኗ ባዶ ስትሆን እና ጨለማ ሲሆን እንኳን ፣ ቤተክርስቲያን በተዘጋችም ጊዜ ፣ ​​ያ መብራት እንደበራ ይቀጥላል፣ መንደዱን ይቀጥላል ፤ በጌታ ፊት ይቀጣጠላል ነገር ግን ማንም አያየውም።

እንደገና በካቶሊክ ቤተክርስቲያን ትምህርተ ክርስቶስ ውስጥ ይህንን በተመለከተ ሲናገር እንዲህ ይላል “ቅባቱ መላ ሰውነታችንን የሚነካው መንፈስ ቅዱስ ፣ የክርስቲያን ጸሎት ውስጣዊ ክፍል መምህር ነው። እርሱ የፀሎት ሕያው ባህል የእጅ ባለሙያ ነው። በእርግጠኝነት ለሚጸልዩ ሰዎች ብዙ የጸሎት መንገዶች አሉ ፣ ነገር ግን በሁሉም እና በሁሉም የሚሠራ አንድ ዓይነት መንፈስ ነው። የክርስቲያን ጸሎት በቤተክርስቲያን ውስጥ ጸሎት የሚሆነው በመንፈስ ቅዱስ ኅብረት ውስጥ ነው” (ቁጥር 2672) ፡፡

ስለዚህ የቤተክርስቲያንን እና የዓለምን ታሪክ የሚጽፈው መንፈስ ቅዱስ ነው። እኛ የእሱን የእጅ ጽሑፍ ለመቀበል ዝግጁ የሆኑ ክፍት ገጾች ነን። እናም በእያንዳንዳችን ውስጥ መንፈስ ቅዱስ የመጀመሪያ ሥራዎችን ያቀናጃል ፣ ምክንያቱም ከሌላው ጋር ሙሉ በሙሉ ተመሳሳይ የሆነ አንድ ክርስቲያን በጭራሽ የለም። በማያልቅ የቅድስና መስክ ውስጥ አንድ አምላክ ፣ የቅድስት ሥላሴ ፍቅር፣ የተለያዩ ምስክሮች እንዲያድጉ ይፈቅድላቸዋል - ሁሉም በክብር እኩል ናቸው ፣ ነገር ግን መንፈስ ቅዱስ ለእያንዳንዳቸው እንዲገለጥ በፈለገው ውበት ልዩ አደረጋቸው፣ የእርሱ ምህረት ልጆቹ አደረጋቸው።

17 March 2021, 11:42