Cerca

Vatican News
ርዕሰ ሊቃነ ጳጳሳት ፍራንቸስኮ በቫቲካን የቅዱስ ጴጥሮስ አደባባይ ርዕሰ ሊቃነ ጳጳሳት ፍራንቸስኮ በቫቲካን የቅዱስ ጴጥሮስ አደባባይ  (ANSA)

ር.ሊ.ጳ ፍራንቸስኮስ “ማነኛውም ዓይነት ጸሎት ወደ እግዚ/ር ዘንድ ሳይደርስ እንዲሁ በከንቱ አይቀርም

“አባታችን ሆይ” ክፍል አራት

ርዕሰ ሊቃነ ጳጳሳት ፍራቸስኮስ ዘወትር ረቡዕ እለት በቫቲካን በሚገኘው በቅዱስ ጴጥሮስ አደባባይ ወይም በቫቲካን በሚገኘው የጳውሎስ ስድስተኛ የስብሰባ አዳራሻ ለሚገኙ ምዕመናን፣ መንፈሳዊ ነጋዲያን እና የሀገር ጎብኝዎች በተለያዩ አርእስቶች ላይ ተመርኩዘው የጠቅላላ የትምሕርተ ክርስቶስ አስተምህሮ እንደ ሚያደርጉ ይታወቃል። በዚህ መሰረት በኅዳር 26/2011 ዓ.ም በቫቲካን በሚገኘው የጳውሎስ 6ኛ የስብሰባ አዳራሽ ያደርጉት የጠቅላላ የተምህርተ ክርስቶስ አስተምህሮ “አባታችን ሆይ” በሚለው ጸሎት ዙሪያ ላይ መሰረቱን ያደርገ የክፍል አንድ አስተምህሮ እንደ ነበረ መዘገባችን የሚታወስ ሲሆን “ኢየሱስ ጸሎት መጸለይ እንዲይስተምረን ልንጥይቀው ይገባል” ማለታቸውን መዘገባችን ይታወሳል።

የዚህ ዝግጅት አቅራቢ መብራቱ ኃ/ጊዮርጊስ-ቫቲካን

በታኅሳስ 03/2011 ዓ.ም አሁንም “አባታችን ሆይ” በሚለው ጸሎት ዙርያ ላይ ባደርጉት የክፍል ሁለት የጠቅላላ የትምህርተ ክርስቶስ አስተምህሮ “አባታችን ሆይ” የሚለውን ጸሎት “በእግዚኣብሔር በመተማመን ልንጸልየው የሚገባን ጸሎት ነው” ማለታቸውንም መዘገባችን ይታወሳል። በታኅሳስ 24/2011 ዓ.ም አሁንም “አባታችን ሆይ!” በሚለው ጸሎት ዙርያ ባደርጉት የክፍል ሦስት አስተምህሮ “ሳትለምነው በፊት ምን እንደ ሚያስፈልግህ በሚያውቀው አባትህ ፊት ሆነህ ጸልይ” (ማቴ. 6፡6) የእኛ አምላክ የሆነው እግዚኣብሔር እርሱ ከእኛ ምንም አይፈልግም፣ ነገር ግን እርሱ ከእኛ የሚፈልገው አንድ ነገር ቢኖር የእርሱ በጣም ተወዳጅ ልጆቹ የሆንን እኛ በጸሎት ሁልጊዜ ከእርሱ ጋር ለመገናኘት የሚያስችለንን የመገናኛ መስመር ሁልጊዜ ክፍት እንድናደርግ ብቻ ነው የሚጠይቀን” ማለታቸውን ባለፈው ሳምንት መዘገባችን ይታወሳል።

ርዕሰ ሊቃነ ጳጳሳት ፍራንቸስኮስ ከዚህ ቀደም “አባታችን ሆይ” በሚለው ጸሎት ዙርያ ላይ በተከታታይ ስያደርጉ የነበረውን የጠቅላላ የትምህርተ ክርስቶስ አሰተምህሮ ይህን ያህል ካስታወስናችሁ በዛሬው እለት ማለትም በጥር 1/2011 ዓ.ም አሁንም “አባታችን ሆይ” በሚለው ጸሎት ዙርያ ባደርጉት የክፍል አራት የጠቅላላ የትምህርተ ክርስቶስ አስተምህሮ እንደ ገለጹት “ማነኛውም ዓይነት ጸሎት ወደ እግዚ/ር ዘንድ ሳይደርስ እንዲሁ በከንቱ አይቀርም!  እርሱ እግዚኣብሔር አባት በመሆኑ የተነሳ በመከራ ውስጥ ሆነው እርሱን የሚለምኑትን ልጆቹን በፍጹም አይረሳም” ማለታቸውን ለመረዳት ተችሉዋል።

በእለቱ የተነበበው ቅዱስ ወንጌል

ስለዚህ እኔም እናንተን የምላችሁ ይህን ነው፣ ለምኑ ይሰጣችሁማል፤ ፈልጉ፥ ታገኙኛላችሁ፤ መዝጊያን አንኳኩ፥ ይከፍትላችሁማል።  የሚለምን ሁሉ ይቀበላልና፥ የሚፈልግም ያገኛል፥ መዝጊያውንም አንኳኩ ይከፈትላችኋል። ምክንያቱ የሚለምን ሁሉ ይቀበላል፣ የሚፈልግም ሁሉ ያገኛል፣ መዝጊያ ለሚያንኳኳ ይከፈትለታል።  ከእናንስ አባት ሆኖ ልጁ እንጀራ ቢለምነው፥ ድንጋይ የሚሰጠው ማነው? ዓሣ ቢለምነው በዓሣ ፋንታ እባብ ይሰጠዋልን? ወይስ እንቍላል ቢለምነው ጊንጥ ይሰጠዋልን? እናንተ ክፉዎች ስትሆኑ ለልጆቻችሁ መልካም ነገር መስጠት ካወቃችሁ፥ በሰማይ ያለው አባታችሁማ  ለሚለምኑት መንፈስ ቅዱስን እንዴት አብልጦ አይሰጣቸውም!

ክቡራን እና ክቡራት የዝግጅቶቻችን ተከታታዮች ርዕሰ ሊቃነ ጳጳሳት ፍራንቸኮስ በጥር 01/2011 ዓ.ም ያደረጉትን የጠቅላላ የትምህርተ ክርስቶስ አስተምህሮ ሙሉ ይዘት እንደ ሚከተለው አሰናድተነዋል ተከታተሉን።

የተወደዳችሁ ወንድሞች እና እህቶች እንደምን አረፈዳችሁ!

ዛሬ የምናደርገው የጠቅላላ የትምህርተ ክርስቶስ አሰትምህሮ በሉቃስ ወንጌል ላይ ያተኩራል። በመሠረቱ የጌታችን የኢየሱስ ክርስቶስን ታሪክ ከሕጻንነቱ ጀመሮ ጥልቅ የሆነ የጸሎት ሕይወት እስከ ጀመረበት ጊዜ ድረስ ያለውን ታሪክ በመግለጽ ደረጃ ይህ የሉቃስ ወንጌል ከሁሉም ወንጌሎች የተሻለ ነው። በውስጡም  ዘካርያስ በመንፈስ ቅዱስ ተሞልቶ የእስራኤል ጌታ አምላክ ይባረክ፥ ጐብኝቶ ለሕዝቡ ቤዛ አድርጎአልና” (ሉቃስ 1፡68-79) በማለት የጸለየው ጸሎት (The Benedictus)፣ ነፍሴ ጌታን ታከብረዋለች፥ መንፈሴም በአምላኬ በመድኃኒቴ ሐሴት ታደርጋለች” (ሉቃስ 1፡47-55) በማለት ማርያም ያቀረበችው የምስጋና ጸሎት (il Magnificat ) እና በመጨረሻም ጌታ ሆይ አሁን እንደ ቃልህ ባሪያህን በሰላም አሰናብተው” (ሉቃ. 2፡29-32) የተሰኘው የስምዖን ጸሎት (il Nunc dimittis) ያካተተ ቤተ ክርስቲያኑን በእየቀኑ የምትጸልያቸውን ሦስት ጸሎቶች በውስጡ አቅፎ ይዙዋል።

ከሁሉም በላይ ኢየሱስ የጸሎት ሰው ነው። ለምሳሌም “ሲጸልይም የፊቱ መልክ ተለወጠ፤ ልብሱም ተብለጭልጮ ነጭ ሆነ” (ሉቃ 9፡29) በማለት በሉቃስ ወንጌል ውስጥ የተጠቀሰው እና ኢየሱስ ተአምራዊ በሆነ ሁኔታ መልኩ መለወጥ የጀመረው ጸሎት በማድረግ ላይ በነበረበት ወቅት ነው። ነገር ግን በኢየሱስ ሕይወት ውስጥ በእያንዳንዱ ደረጃ የእርሱ እንቅስቃሴ ሁሉ የሚመራው በመንፈስ ቅዱስ እስትንፋስ ተነሳስቶ ነው። ኢየሱስ በዮርዳኖስ ወንዝ በመጠመቅ ላይ በነበረበት ወቅት ጸልዩዋል፣ በጣም አስፈላጊ ውሳኔዎችን ከማድረጉ በፊት ከአብ ጋር በጸሎት ይነጋገር ነበር፣ ብዙን ጊዜ ብቻውን ወደ ሚሆንበት ስፍራ በመሄድ በእዚያ ብቻውን ጸሎት ያደርግ ነበር፣ ለምሳሌ “ኢየሱስ ስምዖን ስምዖን ሆይ! እነሆ ገበሬ ስንዴውን ከገለባ አበጥሮ እንደ ሚለይ እንዲሁም ሰይጣን እናንተን ሊያበጥራችሁ ወይም ሊፈትናችሁ ተመኘ። ነገር ግን የአንተ እምነት እንዳይጠፋ እኔ እጸልያለሁ፣ አንተም ተጸጽተህ ወደ እኔ በተመለስህ ጊዜ ወንድሞችህን አጽና” (ሉቃስ 22፡31-32) በማለት ለስምዖን የምልጃ ጸሎት አድርጎ እንደ ነበረም ይታወሳል።

ሌላው ቀርቶ የመሲሑ ሞት እንኳ ሳይቀር በፀሎት መንፈስ ውስጥ ሆኖ የተካሄደ ነው፣ ስለዚህም ነው እነዚያ የመከራ ጊዜያት በሙሉ በሚያስደንቅ መልኩ በከፍተኛ የመረጋጋት መንፈስ የተከናወኑትና ከፍተኛ የሆነ የመረጋጋት ምልክቶች የታዩትም በዚሁ ምክንያት ነው፣ ለምሳሌም በወቅቱ ስያለቅሱ የነበሩትን ሴቶች ኢየሱስ አጽናንቱዋቸዋል፣ ለአሳዳጆቹ ጸልዩዋል፣ ከኢየሱስ ጋር ተሰቅለው ከነበሩት ከክፉ አድራጊዎች መካከል አንዱን ዛሬ ከእኔ ጋር በገነት ትሆናለህ” በማለት ይቅርታ ያደርገለት እና ኢየሱስ  በታላቅ ድምፅ ጮኾ፣ አባት ሆይ፥ ነፍሴን በእጅህ አደራ እሰጣለሁ” (ሉቃስ 23፡46) ካለ በኋላ የሞተበትን እነዚህን አጋጣሚዎች በዋቢነት መጥቀስ ይቻላል። የኢየሱስ ጸሎት በጣም ከባድ የነበረውን አስቸጋሪ የነበሩ ሁኔታዎችን፣ የክህደት እና የበቀል ፍላጎቶችን በከፍተኛ ሁኔታ በማቃለል የሰውን ልጅ በጣም ክፉ ከሆነው ከጠላቱ ሞት ጋር ስያስታርቅ እናያለን።

አሁንም ቢሆን የእርሱ በደቀ-መዛሙርት ከነበሩት ውስጥ አንዱ “ጌታ ሆይ መጸለይ አስተምረን” (ሉቃስ 11፡1) ብሎ የጠየቀው ጥያቄ የሚገኘው በዚሁ በሉቃስ ወንጌል ውስጥ ነው።

ከዚህ ጥያቄ አንፃር በመነሳት ነው እንግዲህ ኢየሱስ እጅግ በጣም ሰፋ ያለ ማብራሪያ በማቅረብ የእርሱ ለሆኑት ደቀ-መዛሙርት ምን ዓይነት ቃላቶችን እና ምን ዓይነት ስሜቶችን ተጠቅመው ወደ እግዚአብሔርን መጸለይ እንደሚገባቸው ያብራራላቸው በዚሁ ምክንያት ነው።

የዚህ ትምህርት የመጀመሪያው ክፍል ለአብ ትክክለኛ የሆነ ጸሎት ስለማድረግ ያመለክታል፣ ይህም  በማቴዎስ ወንጌል ውስጥ የተጠቀሰውን እና እኛ በስርዓተ አምልኮ ወቅት ከምንጠቀመው ጸሎት ይልቅ በሉቃስ ወንጌል ውስጥ ሰፋ ያለ ቅርጽ ይሰጠዋል። አንድ ክርስቲያን "አባት" የሚለውን መጠሪያ በመጠቀም ወደ እግዚአብሔር ጸሎቱን ያቀርባል። በሉቃስ ወንጌል ውስጥ “የእኛ” የሚለው ቃል “በሰማይ የምትኖር” በሚለው ገላጭ ቃል ሲተካ እናያለን። ከዚህም ባሻገር የአጠቃላይ የጸሎቱ መዋቅር ተመሳሳይ ቢሆንም ጥያቄዎቹ ግን ከሰባት ወደ አምስት ይቀንሳሉ።

ነገር ግን በዚህ ኢየሱስ ለደቀ መዛሙርቱ ባስተማረው ፀሎት ውስጥ የሚገኙትን አንዳንድ ትዕዛዞች ውስጥ የሚገኙትን የጸሎቱ አንኳር የሆኑ ሐሳቦችን አንድ ጊዜ ቆም ብለን መመልከት ጠቃሚ ነው። እነዚህም ትዕዛዛት ጸሎቱን የሚጸልየው አማኝ የሆነ ሰው ሊኖረው ስለሚገባ ባህሪ ይገልጻሉ። አንድ መልካም ያልሆነ ሰው ምሳሌን በመጠቀም ወዳጁ በእኩለ ሌሊት ወደ እርሱ ዘንድ ሄዶ “አንድ ወዳጄ ከመንገድ ወደ እኔ መጥቶ የማቀርብለት እንጀራ የለኝም እና አውሰኝ” ብሎ በሚጥይቀበት ወቅት “ተነሥቼ ልሰጥህ አልችልም ይላልን?  ወዳጁ ስለ ሆነ ተነሥቶ ባይሰጠው እንኳ፥ ስለ ነዘነዘው ተነስቶ የሚፈልገውን ሁሉ ይሰጠዋል” (ሉቃስ 11፡9) በማለት ኢየሱስ የተናገረውን ንግግር ማስታወስ ግድ ይላል። ከእዚያም በመቀጠል ወዲያውኑ አንድ አባት የተራበ ልጁን እንዴት እንደ ሚያስተናግድ በመግለጽ “ ከእናንስ አባት ሆኖ ልጁ ዓሣ ቢለምነው በዓሣ ፋንታ እባብ የሚሰጠው ማነው? “ (ሉቃስ 11፡11) በማለት አክሎ ይናገራል።

እነዚህ ምሳሌዎች በመጠቀም ኢየሱስ እግዚአብሔር ሁል ጊዜ የሚመልስ አምላክ መሆኑን እንድንገነዘብ ያደርገናል፣ ማነኛውም ዓይነት ጸሎታችን ሳይሰማ እንዲሁ በከንቱ አይቀርም፣ እርሱ አባት በመሆኑ የተነሳ በመከራ ውስጥ ሆነው እርሱን የሚለምኑትን ልጆቹን በፍጹም አይረሳም።

እርግጥ ነው እነዚህ ከላይ የተገለጹት ማረጋገጫዎች እኛን ሁላችንን ልያደናግሩን ይችሉ ይሆናል፣ ምክንያቱም ብዙዎቹ ያቀረብናቸው ጸሎቶቻችን ምንም ዓይነት ውጤት ያለስገኙልን መስሎን ሊታየን ይችላል። ምን ያህል ጊዜ ጠይቀን አተናል? ምን ያህል ጊዜ ደጋግመን አንኳኩተን በሩ ተዘግቶብናል? የዚህ ዓይነት ሁኔታዎች በሚገጥሙን ወቅት ኢየሱስ እንደ ሚመክረን ጸሎታችንን ተግተን መቀጠል ይገባናል እንጂ ተስፋ ቆርጠን ማቆም የለብንም። ጸሎት ዘወትር እውነታውን ያመጣል፣ በአቅራቢያችን የሚገኙ ነገሮች ባይለወጡም እንኳን እኛ ልንለወጥ እንችላለን።

እግዚአብሔር መልስ እንደሚሰጥ እርግጠኞች መሆን እንችላለን። ብቸኛውና እርግጠኛ ለመሆን የሚያስቸግረን ነገር ቢኖር የጊዜ ጉዳይ ነው እንጂ፣ ነገር ግን እርሱ አንድ ቀን መልስ እንደ ሚሰጠን ግን ጥርጥር የለንም። ምናልባት ዕድሜ ልካችንን ለምነን ይሆናል፣ እርሱ ግን አንድ ቀን መልስ ይሰጣል። እርሱ ዓሣ ለሚተይቀው ልጁ እባብ እንደ ሚሰጠው አባት ዓይነት እንዳልሆነ ቃል ገብቶልናል። ሁላችንም በልባችን ውስጥ እንዲከሰት የምንፈልገው የደስታ ምኞት አንድ ቀን እንደ ሚፈጸም ግን ምንም ጥርጥር የለውም። ይህንን በተመለከተ ኢየሱስ እንዲህ ይላል “እግዚኣብሔር ታዲያ ቀን እና ሌሊት እየጮኹ ለሚለምኑት ሕዝቦቹ አይፈርድላቸውምን?” (ሉቃስ 18፡7) በማለት ይናገራል። በዚያን ጊዜ እንዴት ያለ የክብር ቀን እና ትንሣኤ ይሆናል! የብቸኝነት እና ተስፋ የመቁረጥ ስሜቶቻችን ላይ ድል እስክንጎናጸፍ ድረስ መጸለይ ይኖርብናል። በመንገድ ላይ እንዳለ እንቅስቃሴ ዓይነት ነው፣ በእያንዳንዱ መንገድ መጨረሻ ላይ ሁሉንም ለመቀበል እጆቹን ዘርግቶ የሚጠብቀን አንድ አባት እንዳለ ማመን ያስፈልጋል።

 

06 June 2019, 15:44