ፈልግ

Vatican News
የኅዳር 12/2014 ዓ.ም ሰንበት ዘአስተምሕሮ 1ኛ ወንጌል እና የዕለቱ መልዕክቶች አስተንትኖ የኅዳር 12/2014 ዓ.ም ሰንበት ዘአስተምሕሮ 1ኛ ወንጌል እና የዕለቱ መልዕክቶች አስተንትኖ  (ANSA)

የኅዳር 12/2014 ዓ.ም ሰንበት ዘአስተምሕሮ 1ኛ ወንጌል እና የዕለቱ መልዕክቶች አስተንትኖ

የዕለቱ ምንባባት

1.    ሮሜ 5፥10-21

2.   1ዮሐ. 2፥1-17

3.   ሐዋ. 22፥1-11

4.   ማቴ.6፥5-15

የእለቱ ቅዱስ ወንጌል

ስለ ጸሎት

“ስትጸልዩ እንደ ግብዞች አትሁኑ፤ እነርሱ ለሰዎች ለመታየት ሲሉ በየምኵራቡና በየመንገዱ ማእዘን ላይ ቆመው መጸለይ ይወዳሉና፤ እውነት እላችኋለሁ፤ ሙሉ ዋጋቸውን ተቀብለዋል። አንተ ግን ስትጸልይ ወደ ክፍልህ ግባ፤ በሩንም ዘግተህ በስውር ወዳለው አባትህ ጸልይ፤ በስውር የተደረገውን የሚያይ አባትህም ዋጋህን ይከፍልሃል። ስትጸልዩ፣ ከንቱ ቃላት በመደጋገም ጸሎታቸው የሚሰማላቸው እንደሚመስላቸው አሕዛብ ነገራችሁን አታስረዝሙ። እነርሱን አትምሰሏቸው፤ አባታችሁ ከመለመናችሁ በፊት ምን እንደሚያስፈልጋችሁ ያውቃልና። “እናንተ ግን እንዲህ ብላችሁ ጸልዩ፤ “ ‘በሰማያት የምትኖር አባታችን ሆይ፤ ስምህ ይቀደስ፤ መንግሥትህ ትምጣ፤ ፈቃድህ በሰማይ እንደሆነች፣ እንዲሁ በምድር ትሁን።

የዕለት እንጀራችንን ዛሬ ስጠን። እኛም ደግሞ የበደሉንን ይቅር እንደምንል፣ በደላችንን ይቅር በለን። ወደ ፈተናም አታግባን ከክፉው አድነን እንጂ፣ መንግሥት፣ ኃይል፣ ክብርም፣ ለዘለዓለሙ ያንተ ነውና፤ አሜን።  ’

እናንተ የበደሏችሁን ይቅር ብትሉ የሰማዩ አባታችሁ ደግሞ እናንተን ይቅር ይላችኋል። ነገር ግን የሰዎችን ኀጢአት ይቅር የማትሉ ከሆነ፣ አባታችሁም ኀጢአታችሁን ይቅር አይልላችሁም።

የእለቱ አስተንትኖ

የተወደዳችሁ የእግዚአብሔር ቤተሰቦች እና በጎ ፈቃድ ያላችሁ ሁሉ!

በዚህም ዕለት ጌታችን እየሱስ ክርስቶስ በተለያዩ ንባቦች አማካኝነት ወደ እያንዳዳችን በመምጣት የሚያስፈልገንን ይሰጠናል የጎደለውን ሁሉ ይሞላልናል በእርሱም ቃል እንድንኖር ያበረታታናል።

የአምልኮ ሥርዓታችን ዘመነ ጽጌ (የአበባ ወቅት) የሚባለውን ወቅት ጨርሶ በዚህ ሰንበት ዘአስተምሕሮ የሚባለውንና ለመጪዎቹ አምስት ሳምንታት የሚዘልቀውን ወቅት ጀምረናል። የምሕረት ወይም (ዘአስትምሕሮ) የትምህርት ዘመን የሚል አንድምታ እንዳለው ቢነገርም ሁሉም ግቡ የእሱን ምሕረት ማዳረስ ስለሆነ የክርስቶስ ልደት ከመከበሩ በፊት ስለ እግዚአብሔር ምሕረት በተለያዩ መልኩ እንድናስተነትን ይጋብዘናል።

ቅዱስ ሐዋርያው ጳውሎስ በዛሬው መልዕክቱ ላይ በአዳም በኩል ሞት፥ በክርስቶስ በኩል ሕይወት መጣ በሚለው ሃሳብ ቃሉን ያካፍለናል። በአንድ ሰው በአዳም ኃጢአት እና አለመታዘዝ ምክንያት ሞት እና ፍርድ መጣ (ዘፍ. 2፥15-17፤ 3፥1-3) እንዲሁም በጌታችን ኢየሱስ ክርስቶስ መታዘዝ ምክንያት ለሰው ሁሉ ጽድቅና ሕይወት መጣ (ፊል. 2፥8)። በአዳም በኩል “የሞት ሥልጣን” መጣ፤ በክርስቶስ በኩል “የሕይወት ሥልጣን” መጣ። 

ሁል ጊዜ ጸጋ በኃጢአት ላይ ይነግሣል ፤ ብርሃን በጨለማ ላይ ሥልጣን እንዳለው ሁሉ ጸጋም በኃጢአት ላይ ሥልጣን አለው። ኃጢአት ወደ ሞት ይመራል፤ ጸጋ ደግሞ በክርስቶስ ኢየሱስ ወደ ዘለዓለማዊ ሕይወት ይመራል።ጌታችን ኢየሱስ ክርስቶስ ኃጢአትንና ሞትን በሚገባ አሸንፏል (ሮሜ. 8፥1-21፤ 1ቆሮ. 15፥56)።

በዚህ የመጽሐፍ ቅዱስ ጥቅስ ሦስት ታላላቅ ደረጃዎች ማለትም ጌታችን ኢየሱስ ክርስቶስ የሚሰጠንን ሦስት ታላላቅ ስጦታዎች እንንመለከታለን። የመጀመሪያው ጸጋ ሲሆን ሁለተኛው በጸጋ በኩል የሚገኘውን ጽድቅ እንዲሁም በሦስተኛ ደረጃ በጽድቅ በኩል የሚገኘው ዘለዓለማዊ ሕይወት ናቸው። በዚህም መንገድ ጌታችን ኢየሱስ ክርስቶስ በአዳም በኩል የመጣውን ጉዳት ማስወገድ ብቻ ሳይሆን ከዚያም የበለጠ እንዳደረገ እናያለን። እኛ ሁላችንን የእግዚአብሔር ልጆች እና የመንግሥተ ሰማይ ሀብት ሁሉ ወራሾች አደረገን።

ለጌታችን ኢየሱስ ክርስቶስ መታዘዝ ማለት በብርሃን መኖር ማለት ነው (1ዮሐ. 1፥7) “ነገር ግን እርሱ በብርሃን እንዳለ በብርሃን ብንመላለስ እርስ በርሳችን ኅብረት አለን፥ የልጁም የኢየሱስ ክርስቶስ ደም ከኃጢአት ሁሉ ያድነናል።” በብርሃን ስንኖር ክርስቶስን እናየዋለን፤ እናውቀዋለን። የማንታዘዝ ከሆነ ግን የምንኖረው በጨለማ ስለሚሆን ክርስቶስን ልናውቀው አንችልም። (ማቴ. 7፡21) “በሰማያት ያለውን ፈቃድ የሚፈጽም እንጂ ‘ጌታ ሆይ! ጌታ ሆይ’ የሚለኝ ሁሉ ወደ መንግሥተ ሰማያት አይባልም።” አንዳንዶቻችን በጌታችን ኢየሱስ ክርስቶስ እናምናለን እንል ይሆናል ሆኖም ግን አንታዘዝም። ለእግዚአብሔር ቃል የምንታዘዝ ከሆነ ፍቅሩ በእኛ ፍፁም ይሆናል። የእግዚአብሔር ቃል፤ ሰው በፍፁም ነፍሱ፣ በፍፁም ሃሳቡ፣ በፍፁም ኃይሉ እግዚአብሔርን መውደድ ይገባዋል የሚል ነው። (ማር. 12፥30) ስለዚህም ለእግዚአብሔር ቃል መታዘዝ ማለት እርሱን መውደድ ማለት ነው።

ለእግዚአብሔር ስንታዘዝ፥ እርሱ ወደ እኛ ይመጣል፤ ከእኛም ጋር ይሆናል። (ዮሐ. 14፥23) እግዚአብሔር በእኛ ውስጥ ይኖራል፤ እኛም በእግዚአብሔር እንኖራለን። ጌታችን ኢየሱስ ክርስቶስ እንደኖረው ከኖርን፥ በእርሱ መሆናችንን እናውቃለን፤ በፍቅሩም ውስጥ እንኖራለን ።

በተለይም በእዚሀ ወቅት በቅዱስ ወንጌሉ አማካኝነት ከእግዚአብሔር ጋር ባለን ግንኙነት ላይ ትርጉም ያለው ለውጥ ለማድረግ አንዳንድ ጊዜ በተለመደው ተግባራችን ውስጥ ትንሽ ለውጥ ማድረግ አለብን። በዚህም መሰረት የእግዚአብሔር ምሕረት ነፍሳችን ላይ ጠብ እንዲልና የረሰረሰ መንፈሳዊ ሕይወት እንዲኖረን በዋነኝነት የሚያግዘን የጸሎት ሕይወታችን ነው። በዚህም መሠረት የዛሬው ወንጌል ስለ ጸሎት የሚለን ነገር አለው። መጀመሪያ ላይ "ስትጸልዩም እንደ ግብዞች አትሁኑ ፤ ለሰው ይታዩ ዘንድ በምኩራብና በመንገድ ማዕዘን ቆመው መጸለይን ይወዳሉና" ሲል እንዳንጸልይ ሰበብ የሚያዘጋጅልን ይመስላል። ስለዚህም ቤተ ክርስቲያን ተሰባስቦ መጸለዩ ፣ በየመንገዱ ማማተቡና መስገዱን ትርጉም የለሽ እያደረግን ከጸሎት ለማፈግፈግ ይዳዳን ይሆናል። ነገር ግን ክርስቶስ በሕዝብ ፊት መጸለይን በራሱ አላወገዘም ፤ የተቃወመው የምንጸልይበት ሀሳብን ነው:- "ስትጸልዩም እንደ ግብዞች አትሁኑ፤ ለሰው ይታዩ ዘንድ በምኩራብና በመንገድ ማዕዘን ቆመው መጸለይን ይወዳሉና፤ እውነት እላችኋለሁ፥ ዋጋቸውን ተቀብለዋል።" የሚጸልዩበት ዓላማ በሰው ይታዩ ዘንድ ስለሆነ ከእግዚአብሔር ጋር መገናኘትን አላሰቡም ስለዚህም ይህ ዓይነቱ ጸሎት ዋጋ እንደሌለው ነው ወንጌሉ የሚያስተምረን።

በማቴ. 11፥25 እና በዮሐ. 11፥45 ላይ እንደምናገኘው ክርስቶስ ራሱ በሕዝብ ፊት ጸልይዋል። እንዲሁም ጳውሎስ በሐዋ. ሥራ 27፥35 ላይ እንደምናነበው በሕዝብ ፊት ጸሎት አድርጓል። ቁም ነገሩ በሕዝብ ፊት ሳይሆን በእግዚአብሔር ፊት መገኘታችንን ማሰቡ ላይ እንድናተኩር ነው። በአጭሩ መልእክቱ እንዴት የሚለውን እንጂ የት እንጸልይ የሚለውን እንድናስብ አይደለም።

የሚቀጥለው የወንጌል ጥቅስ ይበልጥ የላይኛውን ሀሳብ ያብራራልናል:- "አንተ ግን ስትጸልይ፥ ወደ እልፍኝህ ግባ መዝጊያህንም ዘግተህ በስውር ላለው አባትህ ጸልይ፤ በስውር የሚያይ አባትህም በግልጥ ይከፍልሃል። "የጸሎታችን ግብ ወደ አባታችን መጸለይ ነው፤ ለእይታ፤ ለቃላት ድርደራ... ችሎታ ሳይሆን ናፋቂ አባት እንዳለው የሚያምን ልጅና አባቱን እንደሚናፍቅ ልጅ ሆነን ማንነታችንን በፊቱ እንድናደርግ ነው። ስለዚህም ክርስቶስ ያስተማረን ትልቁ የመጀመሪያ ነጥብ "ወደ እልፍኝህ ግባ" የሚለው ነው፤ ያም ወደ ልብህ ግባ፤ ውስጥህን ስማ፤ ከውስጥህ በሸሸህ ቁጥር ከእግዚአብሔር ትሸሻለህና ወደ እልፍኝህ ግባ ይለናል። ልባችን ውስጥ የተከማቸው የሚያስጠላ፣ ጥሩ ስሜት የማይፈጥርልን ወይም ደስ የማይል ነገር ይሆናል፤ ሆኖም ግን እግዚአብሔር ያንን ማንነታችንን ይፈልገዋል። ምክንያቱም እሱ ካልሆነ ሌላ ማንም ሊያሳምርልን የሚችል የለምና ልባችንን ደብቀን በውጫዊ ነገር ብቻ ልናገኘው አንችልም። ባለመጸለያችን ከርሱ የሸሸን መስሎን ወደ ሌላ ነገሮች በሄድን ቁጥር ውስጣችን እጥፍ ሸክም ይሆንብናል። ብንደብቀውም እንኳ እሱ ያውቀዋል ግን የደበቅነው መስሎን ራሳችንን እናታልላለን እንጂ መፍትሔው እንካ ደካማነቴን ማለት ነው። ዳዊት ይህን እውነት በተረዳ ጊዜ እንዲህ አለ:-

"ከመንፈስህ ወዴት እሄዳለሁ? ከፊትህስ ወዴት እሸሻለሁ?

ወደ ሰማይ ብወጣ፥ አንተ በዚያ አለህ። ወደ ሲኦልም ብወርድ፥ በዚያ አለህ።

እንደ ንስር የንጋትን ክንፍ ብወስድ፥ እስከ ባሕር መጨረሻም ብበር፥

በዚያ እጅህ ትመራኛለች፥ ቀኝህም ትይዘኛለች።" መዝ. 139፥7-10

ጸሎት ከተውኩ ስንት ጊዜዬ ይሆን? አሁን ሌላ ዓለም ላይ ነው ያለሁት ምናልባት ወደፊት እድሜየም ገፋ ሲል ወደ ጸሎት እመለሳለሁ...የሚል ሰው ሊኖር ይችላል። ይህ ዓይነት አስተሳሰብ ግን ከራስና ከእግዚአብሔር የመሸሽ ሕይወት ነውና ጎዶሎነትን ያለማምደናል። በዛሬው ወንጌሉ ክርስቶስ ያን ዓይነት ኑሮ አይመኝልንም። ወደ ልብህ ግባ በዚያም አባትህን አናግር። የሚያስብላቸው አምላክ እንደሌላቸው ሰዎች አትባክን። በጣም ቅርብህ የሆነ አባት አለህ ይለናል።

ቀጣይ የሆነ የጸሎት ሕይወት መጓዝ አዳጋች ነው። አንዳንድ ምክንያቶች ግልጽ ናቸው:- የሥራ ብዛት፣ ድካም፣ ዘወትር የሃሳብ መበታተን (በቀጣይነት ራስን መሰብሰብ ያለመቻል)፣ የመንፈሳዊ ሕይወት ስንፍና (ሀኬት)፣ የሚያሰለቸን ዓይነት ሥርዓተ አምልኮ፣ ምንም ትርጉም የማይሰጡን ዓይነትና የማይስቡ ጸሎት አደራረጎች ሊሆኑ ይችላሉ። ሌላ የምክንያት ዓይነትም አለ። ይህም ስለ ጸሎት ያለን ግንዛቤ ሲሆን ጸሎት ደስ የሚል፣ የሚስብ፣ የሚያነቃቃ መሆን አለበት ብለን እናስባለን። ሆኖም ግን ሁል ጊዜ ይህን ዓይነት ጸሎት ማድረግ አይቻልም። ለመጸለይ ውስጣዊ ተነሳሽነትና ፍላጎት አይኖረንም፤ ሆኖም ጸሎት ግን ይህን ሁሉ ተፈጥሯችንን ያከብራል።

ጸሎት ቅልል ሲለን፣ ሀሳብችንና ልባችን ወደ እግዚአብሔር ሲያቀና ብቻ፣ ከመሰላቸት፣ ከቁጣ፣ መጥፎ ከምንላቸው ስሜቶቻችን ነጻ ስንሆን የሚጸለይ ቢሆን ምን ያህል ቀናት ብቻ መጸለይ ይቻል ነበር ብለን ማሰብ አለብን። እንዲህማ ከሆነ እግዚአብሔር እኛ ጥሩ ስንሆን ብቻ ሊያየን የሚፈልግ አባት አደረግነው ማለት ነው።

በእውነት በሕይወታችን ውስጥ የሚካሄደውን መሸፈን ፈልገን መሆን የሚገባውን ብቻ መጸለይ እንዳለብን እናስባለን። ጸሎት ማለት እግዚአብሔር መስማት ያለበትን ለመንገር ዝግጁነት ነው ብለን ስናስበው መጸለይ ይከብደናል።

ስለዚህ ስለ ጸሎት ያለንን ግንዛቤ እንመርምር፤ እግዚአብሔር የሚጠብቀን፣ የሚሳሳልን፣ የሚናፍቀን አባት ነው እንጂ በዚህ ገባህ በዚህ ወጣህ ብሎ ሊያስጨንቀን የፈጠረን አምላክ እይደለም። እሱ አስቀድሞ እጅግ ስላፈቀረን እንድናፈቅረውና እንድንቀርበው ይጠብቀናል።

ለኛ ለክርስቲያኖች ጸሎት በሕይወታችን ውስጥ ከምናደርጋቸው ብዙ ነገሮች ውስጥ አንዱ ብቻ ምናልባት ጥቂት ደቂቃዎች የምንሰጠው ጉዳይ ሳይሆን ሕይወታችን ራሱ ጸሎት መሆን እንደሚገባው እናስብ። ቅዱስ ሐዋርያው ጳውሎስ "ሳታቋርጡ ጸልዩ" የሚለውን ስናነብ ለጸሎት ጊዜን ሳይሆን ለጸሎት ሕይወትን መስጠት እንዳለብን ያሳስበናል። ይህም ማለት መግባት መውጣታችን፣ መሥራት መድከማችን፣ ከሰው ጋር መገናኘት ብቻነታችን፣ ወዘተ ሁሉ በእግዚአብሔር ፊት መሆኑን ማስታወስ ማለት ነው። ቀሪ ጊዜያቶቹን እንደሚገባ ካልኖርናቸው አንድ ሰዓት፣ ሁለት ሰዓት ወይም ከዚያ በላይ በጸሎት ማሳለፍ ብቻ ትርጉም ላይኖረው ይችላልና ሳታቋርጡ ጸልዩ የተባልነው ሳናቋርጥ የእርሱን ፈቃድ ማሰብ መሆኑን አውቀን እንደፈቃዱ መኖርን እናዘውትር።

እሱ ሁሌ ከእኛ ጋር አለ፤ ሸሽተን ከማንደበቀው አምላካችን ለየቀኑ ስጦታው በጸሎትና በመሥዋዕት ይልቁንም ከጸሎቶች ሁሉ ጸሎት በሆነው በልጁ መሥዋዕት ማለትም በቅዳሴ እንቅረበው፤ በልባችን ውስጥ ትንሽም ቢሆን ቦታ እንስጠው ብቻም ሳይሆን ልባችንን እንስጠው።

የፀጋው ጉዞ ተከታዮች እና ድምጹንም ማዳመጥ የምንችልበትን ንቃተ ህሊና ለማግኘት እንድንችል እመቤታችን ቅድስት ድንግል ማርያም የእውነተኛ ሕይወት ምንጭ የሆነውን ልጇን  በቅርበት የምንከተልበትን  ኃይልና ብርሃንና  ታሰጠን የሰማነውን ቃል በተግባር ለማዋል እንድንችል ከጎናችን ሆና ታበረታታን እንደ ወትሮው ሁሉ ደግሞ በእግዚአብሔር ፊት ጠብቃችን ሁና ትቁምልን።

 

21 November 2021, 10:52