தென் கொரியாவிலிருந்து திருப்பீடத்திற்கான தூதராக முதன்முறையாக பெண் ஒருவர் நியமனம்

மெரினா ராஜ் - வத்திக்கான்

தென்கொரியா முதன்முறையாக கத்தோலிக்கப் பெண்ணான Oh Hyun-Joo-வை திருப்பீடத்திற்கானத் தூதராக அறிவித்துள்ளது என்றும், இருதரப்பு பிரச்சனைகளையும் கையாண்டு நிர்வாகம் செய்யும் திறன் படைத்தவர் என்றும், தென்கொரியா செய்திகள்  தெரிவிக்கின்றன.

சனவரி 4, இவ்வியாழனன்று, CPBC எனப்படும் கத்தோலிக்க அமைதி ஒலிபரப்புக் கழகம் Oh Hyun- Joo-வைத் தென்கொரியா நாட்டின் திருப்பீடத்திற்கான தூதராகவும் நியமித்துள்ளதை அறிவித்துள்ள நிலையில், ஐக்கிய நாடுகள் நிறுவனத்தின் துணைத்தூதராக, நிரந்தர உறுப்பினராக பணியாற்றிய Joo-வின் தூதரகப் பணிகள், அனைத்துலக வளர்ச்சிக்கான ஒத்துழைப்பு, மேலாண்மை ஆகியவை அவரதுப் புதிய பணிக்கு உதவியாக இருக்கும் என்று தென்கொரிய அமைச்சகம் செய்தி வெளியிட்டுள்ளது.  

2023-ஆம் ஆண்டு திருப்பீடம் மற்றும் தென்கொரியா நாடுகளுக்கு இடையேயான உறவின் 60-ஆம் ஆண்டு நிறைவைக் கொண்டாட இருக்கும் நிலையில், சிறப்பாக நிர்வகிக்கும் திறன் படைத்தவர் Joo என்றும் தெரிவித்துள்ளது தென்கொரிய அமைச்சகம்.

திருப்பீடத்திற்கான 17-வது தென் கொரிய தூதரான Joo, 1969-ஆம் ஆண்டு பிறந்தவர் எனவும், 1994-ஆம் ஆண்டில் கொரிய வெளிநாட்டுப் பணிகளில் சேர்ந்து பணி புரிந்தவர் என்றும், மேலும், அவர் ஐக்கிய நாடுகள் சபையின் இரண்டாவது செயலாளராகப் பணியாற்றியபோது, அமெரிக்காவில் உள்ள நெவார்க் உயர்மறைமாவட்டத்தின் புனித வளனார் கொரியன் பங்குதளத்தில் 2003-இல் கத்தோலிக்கராகத் திருமுழுக்குப் பெற்றவர் என்றும் தகவல்கள் தெரிவிக்கின்றன.

ஐ. நா.வின் மனித உரிமைகள் அவைத் தலைவரின் சிறப்பு உதவியாளராகவும், மேம்பாட்டு ஒத்துழைப்பு இயக்குநராகவும் Joo பணியாற்றியுள்ளார்.

தென் கொரியாவிலிருந்து வத்திக்கானுக்கான முதல் தூதராக ஷின் ஹியூன்-ஜூன் 1974-இல் நியமிக்கப்பட்டார். உலகம் முழுவதிலுமிருந்து திருப்பீடத்திற்கான தூதர்களாக ஏறக்குறைய 20 பெண்களை வத்திக்கான் பெற்றுள்ளது. இருப்பினும், வத்திக்கானுக்குப் பெண் தூதரை அனுப்பிய முதல் கண்டம் ஆப்பிரிக்கா என்பது குறிப்பிடத்தக்கது. (UCAN)