Hebdomada Papae, o boletim em latim do Vatican News

HEBDÓMADA PAPAE”

NOTÍTIAE VATICÁNAE LATÍNE RÉDDITAE

Die quinto mensis Augústi anno bismillésimo vicésimo tértio

TÍTULI

Lisipónem ádiit Póntifex ut Diéi Mundiális Iuventútis interésset convéntui: iuvénibus dicit: spei magístri estóte pro terrárum orbe; rem políticam coléntibus: somniámus Európam, belli expértem.

In Angélica Precatióne pro Líbano precátur Francíscus idémque hortátur ne prohíbeat bellum quóminus fruméntum in indigéntes Natiónes pervéniat.

Mense próximo Septémbri duos dies Massíliae morábitur Póntifex “Occúrsus Mediterránei Maris” participándi cáusa.

Salútem plúrimam ómnibus vobis dicit Alexánder De Carolis núntios Latínos audiéntibus.

NOTÍTIA 1

A die áltero mensis Augústi Lisipóne adest Francíscus Papa, tricésimi séptimi Diéi Mundiális Iuventútis celebrándi cáusa. Cras postrémae sanctae Missae praesidébit; praetéritis diébus iúvenes convénit aeque ac Natiónis potestátes. Refert Rosárius Tronnolone.

Iuvéntus “spei pro terrárum orbe magístra” est. Id unum est ex multis cogitátis quod innúmeris iuvénibus, máribus quidem feminísque, trádidit Francíscus, qui mensis inítio Lisipónem colóribus studióque locupletavérunt. Hac in príncipe urbe Lusitána Dies Mundiális Iuventútis, anno bismillésimo vicésimo tértio, ágitur atque illuc die praetérito Martis appúlit Francíscus, qui Natiónis potestátes contínuo convénit atque Civitátum legatiónes, quibus dixit se Európam somniáre “belli fóculos exstinguéntem”. Die tértio mensis Augústi iúvenes convénit, studiórum Universitátis alúmnos, eorúmque ínsuper aequáles, nempe “Scholas Occurrentes”. Una cum illis dum in muro figúrae partem píngeret, cohortátus est iúvenes Póntifex ut “manus infícerent, ne vita inficerétur”. Inter ália, quíndecim Ucraínae iúvenes convénit cum quibus Francíscus orávit ut in illa Europǽa Natióne bellum componerétur.

NOTÍTIA 2

In Angélica Precatióne die tricésimo mensis praetériti Iúlii christiános est hortátus Francíscus ne in mediocritátem incíderent atque íterum locútus est de Líbani discrímine itémque de bello in Ucraína. Lóquitur Mónia Parente.

Úndecim mílibus fidélium in Petriáno Foro adstántibus memorávit Póntifex “Deum iteráre non solére”, ideóque qui credit, in consuetúdines, in mediocritátes conclúdi non pátitur, qui e contrário invitátur ut “boni sómnia colat, nova inquírat” Spíritus, qui vitae res novas reddit”. Mariáli precatióne dicta, Francíscus tres annos transísse est recordátus a funestíssima diruptióne apud Beryténsem portum, in Líbano, de interitórum famíliis cógitans necnon de illis qui veritátem illíus calamitátis adhuc reqúirunt. Nec défuit suéta precátio pro Ucraína, bello vexáta. Peculiárem in modum hortátus est Póntifex ut Ponti Euxíni incéptum revocarétur ac fruméntum tuto transferrétur. “Clamor esuriéntis – inquit - caelum contíngit”.

NOTÍTIAE BREVÍSSIMAE

Mensis Septémbris sub finem, die vicésimo áltero et die vicésimo tértio Massíliae erit Póntifex, ut “Occúrsum Mediterránei Maris” partícipet, ad finem iam vergéntem, qui convéntus sibi vult ut ómnium confessiónum ac religiónum iúvenes coaléscant, una cum epíscopis, consociatiónibus motibúsque illárum Natiónum, quae Mare Nostrum prospéctant.

Die vicésimo séptimo praetériti mensis Iúlii in cathedráli templo Myeong-dong, Séuli, cardinális Lázarus You Heung-sik, Papae Francísci legit núntium, septuagésimo interveniénte anniversário indutiárum Coreáni belli. Qui núntius Coreános hortátur: pacis estóte prophétae.

Satis est dictum, próxima hebdómada quae evénerint narrábimus.