Hebdomada Papae, as notícias da semana em latim

«HEBDOMADA PAPAE»

Notitiae Vaticanae Latine redditae

diei sexti mensis Iulii anno bismillesimo vicesimo secundo

Ex Cánada Póntifex: congruéntia est reperiénda inter res, quae nunc sunt et quae praeteriérunt.

Francíscus fragrórem mémorat in portu Beryténsi: «Véritas ne ábdite láteat».

Salútat Póntifex párvulos Círculi Aestívi Vaticáni.

Salútem plúrimam ómnibus vobis auscultántibus núntios Latína língua prolátos dicit Márius Galgano.

In Audiéntia Generáli várias «peregrinatiónis paenitentiális» statiónes revocávit Francíscus Papa, a die vicésimo quarto ad tricésimum diem mensis Iúlii una cum indígenis emetítas, quae «memória, reconciliatióne ac sanatióne» noténtur, unde «Ecclésiae spes manat». Recordátus est «quasi álapas» dolórem senum Se animadvertísse, qui líberos amisérunt propter «óperam assimilatiónis», sed «vultus noster erat ponéndus pro erróribus nostris, peccátis nostris». Lóquitur Monia Parente.

Omnes praecípuas statiónes Papa recénset itíneris apostólici, ab Edmuntópoli Quebécum usque ad óppidum Iqaluítum, atque mémorat Se confirmásse illíus Natiónis potestátibus, primóribus indígenis atque legatórum coétui «actuósam» Sanctae Sedis localiúmque Ecclesiárum voluntátem «primigénias cultúras promovéndi per cóngrua spiritália itínera atque stúdium consuetúdinum ac populórum sermónum». Eláte ínsuper Ipse ímprobat «ratiónem coloniárum efficendárum», quae hódie exstant «ex váriis novísque speciébus ideologicárum ratiónum coloniárum efficiendárum, quae translatícias consuetúdines, históriam et religiósa populórum víncula minántur, diversitátes aequántes» ac saepe «in debilióres infirmiorésque offícia» neglegéntes.

***

Sub finem Audiéntiae Generális, calamitátem anni bismillésimi vicésimi memorávit Francíscus in Líbani príncipe urbe, eiúsdem adveniénte anniversário secúndo. Precátur pro victimárum famíliis, exóptans ut «Líbanus, Natiónum communitáte adiuvánte, iter renascéntiae pergat, fidélis manens vocatióni pacis terrae títulum sustinéndi». Refert Alexánder De Carolis.

Sauciátus Líbanus, ubi die quarto mensis Augústi anniversárium commemorátur álterum terríbilis incendiárii fragóris in portu Beryténsi acti, ex quo plus ducénti hómines interiérunt et plus sex milia vulneráti, in Francísci mentem redit. Audiéntia Generáli exeúnte, catechési absolúta itíneri in Canadam, nuper facti, prorsus dicáta, convértit Se Póntifex ad victimárum famílias «illíus funésti evéntus» necnon «ad diléctum pópulum Libanénsem». De quo usque sollicitátur Francíscus et pro quo die primo mensis Iúlii praetériti anni diem precatiónis mediationísque una cum Ecclésiis orientálibus praepósitis in Urbe Vaticána celebráverat.

Spes pacis Francísco Papae inest in Ucráina, ubi bellum géritur,  quod, cum occásio data est, «insánum saevúmque» designávit. Audiéntia finíta, cum Polónos peregrínos salutáret, quibus grátias egit de «subsídio» precatiónis Sibi iter in Cánadam faciénti tribúto, Francíscus memorávit complúres Polónos fidéles mense Augústo pédibus se conférre ad sanctuárium Clari Montis (lingua polóna Jasna Góra) aliáque mariána sanctuária.

Catechési absolúta, Póntifex peculiárem in modum púeros salutávit, qui oratórium aestívum participárunt, intra moénia Vaticána constitútum. Ante Audiéntiam Generálem animatóres convénit ac moderatóres Círculi Aestívi qui, cópia quoque nonnúmquam data precatióni mediationíque faciéndae, intra Civitátem Vaticánam ágitur, ubi loca reperiúntur ad lúdicam, reficiéntem et gýmnicam óperam exercéndam.

Haec háctenus, próxima hebdómada, eádem hora, rursus ad vos.