Hebdomada Papae, o boletim em latim do Vatican News

“HEBDÓMADA PAPAE”

Notítiae Vaticánae Latíne rédditae

Die vicésimo quinto mensis Septémbris anno bis millésimo vicésimo primo

(TÍTULI)

Áliis inservíre praecípua est christiáni nota, quam in dominicáli catechési precatiónis, quae Ángelus, collustrávit Póntifex.

Summus Póntifex suum apostólicum iter Budapéstinum et in Slováchiam, grátias plúribus réferens, summátim perstrínxit in Audiéntia generáli die Mercúrii.

Próxima synodális séssio príncipem obtínuit locum, cum Francíscus membra Consílii Cardinálium convénit.

Salútem plúrimam ómnibus vobis auscultántibus núntios Latína lingua prolátos dicit Philíppus Herrera-Espaliat.

(NOTÍTIAE PRAECÍPUAE)

Complúres peregríni in Petriánum Forum postréma aestátis domínica die convenérunt, Pontíficis de Evangélio meditatiónem auditúri. Cardo eius sermónis fuit christiánum servítium, idem scílicet agéndi modus quem dócuit et ténuit Dei Filius. Audiámus Olgam Sakun.

Catechésis témpore cum oratióne Ángelus coniúnctae, Francíscus enodávit veram humanórum iudiciórum inversiónem intulísse Christum, cum discípulos, primas partes ágere cupiéntes, obiurgáret. Étenim, est argumentátus persónae pondus haud ex loco pendére quem óccupat aut ex felícibus evéntibus quibus gáudet. Ad Pontíficis mentem magnitúdo et felix éxitus Dei óculis ex servítio perpendúntur. Non ex eo quod habétur, sed ex eo quod datur. Hoc arguménto inníxus ac sibi cónscius servítii iter crucem sápere, Petri Succéssor unumquémque invitávit ut se percontarétur utrum illum conveníre cúperet qui magis neglégitur, an própria benefícia requíreret.

Ánimum pénitus gratum Deo omnibúsque iis, qui in Iter Apostólicum Budapéstinum et in Slováchiam multum óperis contulérunt, in Audiéntia Generáli féria quarta praetérita osténdit Póntifex. Praecípua moménta suae visitatiónis Mediánae Európae summátim Francíscus perstrínxit. Compósuit Catharína Agorelius.

Quasi peregrinátio precatiónis, peregrinátio nempe ad radíces ac peregrinátio spei. Sic suum iter summátim perstrínxit Francíscus Póntifex, quo ad Natiónes pervénit diutúrnae christiánae traditiónis. Precátio potíssimum ardens se pandit Missae témpore, Congréssum Eucharísticum Internationálem ad éxitum ducéntis, in Divína Litúrgia Byzantína Bratisláviae et in Missa apud Sanctuárium Mariánum in loco Šaštin. Occúrsus quoque memorávit Póntifex cum Hebrǽi pópuli delegátis ac diversórum órdinum patiéntium. Áttamen, ante ómnia, in Pontíficis corde permágnus ínsidet spei sensus, dum cernit tot iúvenes ac tot cum púeris famílias.

(NOTÍTIAE BREVÍSSIMAE)

Per interréte ex Civitáte Vaticána et váriis habitatiónis Natiónibus coniúnctio facta est inter Pontíficem et Cardináles Consílii, qui sociátam óperam prǽstant universáli Ecclésiae moderándae. Duas horas occúrsus perseverávit, próximae sessióni synodáli destinátus, quam ad Francísci mentem arcére opórtet clericórum nímium dominátum ac durítiam et auscultándi praebére cópiam necnon hábitus pastóralis.

Finis fit húius editiónis, conveniémus, ad Dei voluntátem, próxima hebdómada.