Hebdomada Papae, o boletim em latim do Vatican News

“HEBDÓMADA PAPAE”

Notítiae Vaticánae Latíne rédditae

         Die duodevicésimo mensis Septémbris anno bis millésimo vicésimo primo

(TÍTULI)

Summi Pontíficis senténtia ex Missa deprómpta exeúnte Congréssu Eucharístico internationáli: Deus amor est crucifíxus ac donátus.

Iter apostólicum Francísci in Slováchiam, qui ait: christiáni diálogi textóres estóte.

Diurnários in aeropláno allóquens, cum Bratislávia redíret, Póntifex dixit: abórtus est homicídium, próxima sit Ecclésia ac miséricors, non política.

Salútem plúrimam ómnibus vobis auscultántibus núntios Latína lingua prolátos dicit Catharína Agorelius.

(NOTÍTIAE PRAECÍPUAE)

Die domínico duodécimo mensis Septémbris Summus Póntifex Francíscus Congréssum Eucharísticum internationálem ad finem addúxit Budapéstini, conclusiónis prǽsidens Missae. Quartum et tricésimum apostólicum iter Francísci, a die duodécimo ad quintum décimum diem mensis Septémbris, brevi peregrinatióne in Hungária inítium sumpsit. Lóquitur Alexánder De Carolis.

Quartum et tricésimum iter Sanctus Pater incohávit, invísens príncipem Hungáriae urbem, ut Congréssui Eucharístico Internationáli finem impóneret. Contínuo post Budapéstinum quam pervénerat, die duodécimo mane mensis Septémbris, Ioánnem Áder Húngarum Prǽsidem et primum minístrum Victórem Orbán priváto modo convénit, antéquam Epíscopos et oecuménicos legátos alloquerétur, petitúrus póstea Héroum Forum ad Missam celebrándam. Coram Centum mílibus ámplius fidélium Francíscus Statiónem Orbis celebrávit, Congréssum Eucharísticum internationálem ad finem addúcens, atque in homília est cohortátus ut paterémus “novitátis scándalo” Dei, qui est “servus crucifíxus” et non “potens messías”. Christiáni iter – enodávit Póntifex – non est ad succéssum impétus, sed íncipit per retrovérsum gradum”. Eucharístia – recordátur Póntifex – in memóriam nos rédigit Deum esse: amórem útique crucifíxum ac donátum.

*****

Contínuo post Missam Budapéstini celebrátam, post merídiem duodécimo die mensis Septémbris Papa in Slováchiam se cóntulit, ubi subsequéntibus tribus diébus várias Natiónis partes convénit. Compósuit Mónia Parente.

Maióris moménti evéntus Slováchiae visitatiónis, quos senténtia dénotat “Cum María et Ioseph in via ad Iesum”, complúres fuérunt, ex quibus improbátio antisemitísmi exstat apud communitátem Hebráicam enuntiáta, atque convéntus cum iuvénibus quibus grávia de amóre ac matrimónio verba Póntifex trádidit. Hamaxobiórum movens fuit quoque occúrsus, ac proínde honor Maríae tribútus in sanctuário loci Šaštin, ubi, Missa celebráta in festo Beátae Maríae Vírginis a Septem Dolóribus, caeléstis Patrónae Slováchiae, adstántibus sexagínta mílibus fidélium, iter apostólicum confécit. In homília Francíscus postulávit “ne reducerétur fides ad sáccharum”, sed ut Maríae dulcédine sanarétur cor.

(NOTÍTIAE BREVÍSSIMAE)

Ut ex more, a Slováchia Romam rédiens in aëropláno, quinto décimo mensis Septémbris die, cum diurnáriis círciter dimídiam horam Francíscus Papa est sermocinátus. Diurnariórum respóndens percontatiónibus, de diálogo cum Húngaris potestátibus est locútus, de antisemitísmo ac de vaccínis, aeque ac de uniónibus homosexuálibus et de abórtu, qui, áddidit, “est homicídium”. Hac de re, confirmávit Póntifex, haud mutat mentem Ecclésia, quae próxima esse debet ac miséricors, non política.

Haec háctenus, próxima hebdómada rursus ad vos.