Hebdomada Papae, o boletim em latim do Vatican News

“HEBDÓMADA PAPAE”

Notítiae Vaticánae Latíne rédditae

Die quarto mensis Septémbris anno bis millésimo vicésimo primo

(TÍTULI)

Póntifex post sectiónem chirúgicam:  “Numquam in ánimo mihi fuit Summi Pontificátus offícium depónere”.

Ingens terrárum orbis cum sit discrímen, Francíscus ad christiános: pro commúni sorte operémur.

Póntifex ait: animóse immutáre seligámus, ut Terra servétur.

Salútem plúrimam ómnibus vobis auscultántibus dicit Márius Galgano et felíciter vobis audiéntibus núntios Latína lingua prolátos.

(NOTÍTIAE PRAECÍPUAE)

Francíscum Papam est percontátus Cárolus Herrera ex radiophónio COPE. Primo nempe de sectióne chirúrgica mensis Iúlii lóquitur et aggréditur item quaestiónes quoque de Afghanistánia, Sinis, euthanásia, Cúriae reformatióne. Docet Rosárius Tronnolone.

De coli sectióne chirúrgica, quam die quarto praetériti mensis Iúlii apud Valetudinárium Gemelli tulit, ac de praesénte valetúdine, de discrímine in Afganistánia ac de sollicitúdine in pópulum convérsa dísserit. Addúntur diálogus cum Sinis, “sémita persequénda”, quae de euthanásia et abórtu sentit, utróque “reiectiónis cultus” simulácro, magnum iudícium in Civitáte Vaticána, ac tandem eius Pontificátus provocatiónes, quae sunt Cúriae reformátio et corruptéla ac paedophília profligánda. Pontificátus, qui fere ad nonum annum pervénit, contra ac per communicatiónis instruménta Itálica et Argentína fertur, non intermíttitur ante quam statútum est:  “Numquam in ánimo mihi fuit Summi Pontificátus offícium depónere”. Horam et dimídiam prodúcitur percontátio quam Francíscus Papa sub hebdómadae finem radiophóno Cope, vidélicet emissório instruménto Conferéntiae Episcopális Hispániae concéssit. Haec prima est percontátio post sectiónem chirúgicam stenósis diverticoláris.

***

In Audiéntia generáli, prima quidem mensis Septémbris, Póntifex est recordátus hódie Tempus Creáti incohári atque próximis diébus Núntium futúrum una simul cum Patriárcha oecuménico Bartholómaeo et Iustíno Welby, archiepíscopo Cantuariénsi. In Páuli sexti Áula legátio quoque áderat Motus Laudato si’ quae Pontíficem donávit tentório Abrahámi, mínimo modo effícto, quod est imágo editiónis anni bismillésimi vicésimi primi. Notum facit Olga Sakun.

Francíscus Póntifex, apud Páuli sexti Áulam, sériem prodúxit explicatiónum Epístulae ad Gálatas, “stultos” eos defíniens qui “in perículum se commíttunt fidem amitténdi”, atque cohórtans item ne alliciántur durítia “consiliórum subspeciosórum”. Finem fáciens est cohortátus ad una operándum creáti servándi cáusa, “his tempóribus universális discríminis”. “Preméndi sunt christiáni ut animadvértant quantum in médio ponátur neve péllici sínant Sirénum voce, quae eos perdúcere vólunt ad religiónem, quae tantum in praecéptis stricte observátis nítitur”. Hoc epistúlae ad Gálatas est propósitum, quae cohortátur ut ne quis “áliis núntiis distrahátur”.

(NOTÍTIAE BREVÍSSIMAE)

Noster vivéndi modus est excutiéndus necnon rátio qua terrárum bona adhibeámus ut oecológica ac sociális commutátio fiat, quae offícii consciéntia, observántia ac sobrietáte nítitur. Quod in televisífico núntio continétur qui precatiónis propósitum secum fert quodque Francíscus Papa Ecclésiae commíttit mense Septémbri. Id iam fáciunt iúvenes, planum facit Francíscus, ab eis sumámus exémpla.

In Audiéntia generáli apud Cavǽdium Sancti Dámasi Francíscus cohortátur ut ad Patrem convertámus étiam precatiónem quae est illud “cur”, quómodo puer suo cum patre agit, atque iter difficílibus étiam tempóribus perseveránter faciámus.

Haec háctenus dénuo próxima hebdómada.