Kardinali Parolin: modele të reja prodhimi kundër urisë në botë

R.SH. - Vatikan

Përfundoi më 31 maj, seria e tre uebinarëve, organizuar nga Sekretaria e Shtetit e Selisë së Shenjtë, nga Misioni i Përhershëm i Selisë së Shenjtë në FAO, IFAD dhe në Programin Ushqimor Botëror (WFP), nga Dikasteri për Nxitjen e Zhvillimit të Gjithanshëm Njerëzor e nga Komisioni i Vatikanit COVID-19. Tema e nismës: “Ushqim për jetën, drejtësi ushqimore, ushqim për të gjithë”.

Objektivi

Frymëzuar nga Letra Enciklike “Laudato si’” e Papës Françesku, qëllimi i seminareve në internet ishte promovimi i ekologjisë së gjithanshme, kuptuar si paradigmë, që i konsideron sistemet shoqërore të lidhura me ekosistemet. Kjo është pikënisja për përtëritjen e sistemeve ushqimore në të ardhmen, pas pandemisë së koronavirusit, e cila, vitin e kaluar shkaktoi numrin më të lartë të njerëzve të paushqyer në botë, krahasuar me pesë vitet e fundit. Në takimin, që mbylli serinë e uebinareve, Sekretari i Shtetit të Vatikanit, kardinali Pietro Parolin vuri në dukje nevojën e shndërrimit të sistemeve ushqimore, në mënyrë që të tregohet më tepër kujdes për ambientin, duke synuar çrrënjosjen e urisë, respektimin e dinjitetit njerëzor dhe shërbimin për të mirën e përbashkët.

Në përgatitje të Takimit botëror mbi sistemet ushqimore

Tre uebinarët filluan gjatë javës “Laudato si’” (16-24 maj). U dhanë zë grave, bashkësive autoktone, njerëzve që përjetojnë kriza, fermerëve të vegjël, në mënyrë që nga përvoja dhe nga urtia e tyre tradicionale të nxirren mësime për t’u propozuar në debate globale dhe në plane veprimi. Përfundimet e uebinarëve do të jenë kontributi i Kishës Katolike në reflektimin e bashkësisë ndërkombëtare, që ka dy çaste qendrore gjatë muajve të ardhshëm.

Në shtator, Takimi kushtuar sistemeve ushqimore do të zhvillohet në Nju Jork, në kuadrin e Asamblesë së përgjithshme të Kombeve të Bashkuara. Por, më parë, nga 19 deri më 21 korrik, në Romë, do të mbahet i ashtuquajturi para-samit, kërkuar nga presidenca italiane e G20-ës. Kardinali Parolin, që mori pjesë në uebinarin e fundit, kërkoi veprime “konkrete, incizive, të matura” në nivel ndërkombëtar. Është e nevojshme, kujtoi ai, të rimendohen sistemet ushqimore për t’i bërë ato më rezistente, më solidare, më të afta për t’i bërë ballë pasigurisë ushqimore, duke vënë në qendër ekonomitë lokale.