Papa pret Kapitenët Regjentë të San Marinos: në qendër, Covid dhe vaksinat
R. SH. - Vatikan
Ati i Shenjtë Françesku priti sot në audiencë, në Pallatin Apostolik të Vatikanit, Kapitenët Regjentë të Republikës së San Marinos, Alessandro Cardelli dhe Mirko Dolcini, të cilët më pas takuan Sekretarin e Shtetit të Shenjtërisë së Tij, kardinalin Pietro Parolin, se bashku me Sekretarin vatikanas për Marrëdhëniet me Shtetet, imzot Paul Richard Gallagher. Lajmi u dha nga Salla e Shtypit të Vatikanit.
Gjatë bisedave të përzemërta, u shpreh kënaqësi për bashkëpunimin e frytshëm ndërmjet Selisë së Shenjtë dhe Republikës së San Marinos. U fol për disa çështje ndërkombëtare me interes të përbashkët, si marrëdhëniet me Bashkimin Evropian dhe perspektivat e diplomacisë shumëpalëshe.
Vëmendje e veçantë iu kushtua emergjencës shëndetësore dhe programit aktual të vaksinimit në Republikën e San Marinos, politikave familjare dhe mbështetjes së lindjeve, si dhe çështjes së emigracionit dhe korridoreve humanitare. Të dyja palët konfirmuan gatishmërinë e tyre për të vazhduar bashkëpunimin konstruktiv në kuadrin e bashkësisë ndërkombëtare.