Delegati Apostolik i Vatikanit për Kosovën, Imzot Speich viziton dioqezën Prizren-Prishtinë

R.SH. - Vatikan

Delegati Apostolik i Selisë së Shenjtë për Kosovën, Nunci Apostolik në Slloveni, Imzot Jean Marie Speich, i shoqëruar nga Sekretari dom Daniele Lessi, gjenden për një vizitë në Kosovë, në gjirin e Kishës dioqezane Prizren-Prishtinë nga data 14 deri më 17 tetor 2019.

Kjo vizitë tregon edhe një herë dashurinë e Atit të Shenjtë ndaj popullit, vëmendjen e Selisë Shenjtë ndaj realitetit të Kosovës dhe kujdesin për mirëvajtjen e vendit.

Gjatë kësaj vizite, Nunci Apostolik – Delegat i Selisë së Shenjtë për Kishën katolike në Kosovë, imzot Jean-Marie Speich, do të kremtojë sot, 16 tetor, në ora 19.00, së bashku me ipeshkvin e vendit, imzot Dodë Gjergjin, klerin dhe pjesëmarrjen e besimtarëve, Meshën e Shenjtë në Katedralen ‘Shën Nënë Tereza’ në Prishtinë. Kështu njofton  famullitari i Katedrales së Prishtinës dom Fatmir Koliqi.

Kujtojmë se Imzot Jean-Marie Speich është emëruar, më 19 mars 2019, në festën e Shën Jozefit,  nga Papa Françesku Delegat Apostolik për Kishën katolike në Kosovë.